بەپێی هەواڵی کوردپرێس، هۆشیار زێباری، ئەندامی مەکتەبی سیاسی پارتی دیموکراتی کوردستان، لە سەکۆی (ئێکس) نووسیویەتی: ڕاپۆرتەکەی ئاژانسی هەواڵی ڕۆیتەرز، سەبارەت بە ئامادەیی ژمارەیێک لە گرووپە چەکدارەکانی عێراق بۆ داماڵینی چەکەکانیان و تێکەڵ بوون بە دەزگا ئەمنییەکان، ڕاپۆرتێکی ناڕاست و نادروستە.

زێباری ڕاشیگەیاندووە: "وا دیارە پەیامنێرانی ئاژانسەکە فریو دراون بە دزەپێکردنەکانی بەرپرسێکی حکوومەت، کە بەدوای ناوبانگ و ئەستێرەبووندا دەگەڕێت و  شارەزایە لە خۆبردنە پێشەوەدا".

شایانی باسە لە ڕاپۆرتەکەی ئاژانسی هەواڵی ڕۆیتەرزدا، کە باسی لە ڕەزامەندیی ژمارەیێک گرووپی دیاری بەرەی مقاوەمەی ئیسلامی کردووە لە عێراق بۆ دانانی چەکەکانیان،  دوو سەرچاوەی عێراقی بە ناسنامەی ئاشکرای خۆیانەوە قسەیان کردووە، یەکەمیان، عیزەت شابەندەرە، کە کەسایەتیێکی دیارە بەڵام هیچ پۆستێکی حکوومیی نییە، دووەمیشیان، فەرهاد عەلادینە، کە ڕاوێژکاری سەرۆک وەزیرانی عێراقە بۆ کاروباری دەرەوە.