بەپێی هەواڵی کوردپرێس، ڕوانگەی سووری بۆ مافەكانی مرۆڤ، ئەمڕۆ دووشەممە لە ڕاگەیەندراوێكدا بڵاوی كردەوە،  سەرلەبەیانی ئەمڕۆ بەهۆی تەقینەوەی ئۆتۆمبێلێکی بۆمبڕێژکراوەوە ۱۸ کەس کوژران و ۱۲ کەسی دیکەش بریندار بوون کە زۆرینەی قوربانییەکان کرێکاری کارگەیێک بوون.

ڕوانگەی سووری ئاماژەی بەوەش كرد، لە ئەنجامی تەقینەوەكەی مەنبج ۱۸ كەس گیانیان لەدەست داوە كە ۱۴یان ژنن، هەروەها ۱۲ كەسی دیكەش برینداربوون كە زۆرینەیان ژن و منداڵن، هەروەها تەقینەوەکە لە دەوازەی سەرەکیی شاری مەنبج و لە سەرە رێگای سەرەکی ئۆتۆستارد ڕوویداوە، کە دەکەوێتە ژێر دەسەڵاتی گرووپەکانی سوپای نیشتیمانیی سەر بە تورکیا.

بەگوێرەی بەرگریی شارستانیی سووریا، بەشێکی برینداران برینەکانیان سەختە، "کە ئەوەش وا دەکات بەرزبوونەوەی ئاماری گیانلەدەستدان چاوەڕوانکراو بێت."

 هەموو ئەوانەی بەر تەقینەوەکە کەوتوون، "کرێکاری کشتوکاڵین."