بەپێی هەواڵی کوردپرێس، لەمبارەوە قائیمقامی چەمچەماڵ ڕاگەیاند لە کاتژمێر ۶:۴۵ی ئێوارەی هەینی لە رێگەی فڕۆکەی بێ فڕۆکەوانی نەناسراوەوە هێرشکراوەتە سەر کێڵگەی غازی کۆرمۆر لە ناحیەی قادر کەرەمی سەر بە قەزای چەمچەماڵ.

ڕەمەک ڕەمەزان ئاماژەی بەوەشکرد، بە گوێرەی چەند زانیارییەکی سەرەتایی هێرشەکە لە رێگەی فڕۆکەی بێ فڕۆکەوانەوە بوە، بەڵام هێشتا دڵنیا نین، تا ئێستاش زیانە گیانی و مادییەکان بە رونی نازانرێت.

ناوبراو وتیشی: بەهۆی هێرشە درۆنییەکەی سەر کێڵگەی غازی کۆرمۆرەوە ۶ کەس بەرکەوتوون، ۲ کەسیان گیانیان لەدەستداوە و ۴ کەسی دیکەشیان برینداربوون.

هەروەها بەهۆی هێرشەکەوە بەرهەمهێنانی غاز ڕاگیراوە و رێژەی بەرهەمهێنانی کارەباش بە بڕی دو هەزار و ۵۰۰ مێگاوات کەم بووەتەوە، تیمەکانی وەزارەتی کارەبا و سامانە سروشتییەکان لە هەوڵدان بۆ ئاساییکردنەوەی دۆخەکە و دوبارە دەستپێکردنەوەی گاز بۆ وێستگەکانی کارەبا.