بەپێی هەواڵی کوردپرێس، ڕوانگەی سووری بۆ مافەکانی مرۆڤ ده‌ڵێت: "چەکدارانی دیفاع وەتەنیی سەر بە حکوومەتی سووریا، هێرشیانکردوەتە سەر سێ خاڵی هێزەکانی هەسەدە و هەوڵیانداوە لە ڕووباری فوراتەوە بە بەلەم بەرەو ناوچەکانی ژێر کۆنترۆڵی هەسەدە پێشڕەوی بکەن".

ئه‌وه‌ش ئاشكرا كراوه‌، "هێزەکانی هەسەدەش لە شارۆچکەکانی جەزرە بوشەمس ‌و بەکرەوە بە چەکی قورس وەڵامی هێرشەکەیانداوەتەوە و سەرەڕای ئەوەش، هێزەکانی دیفاع وەتەنی توانیویانە یەکێک لە خاڵە سەربازییەکانی هەسەدە ئاگر تێبەربدەن".

باس له‌وه‌شده‌كرێت، "بەو هۆیەوە پێکدادانی قورس لەنێوان ئەو دوو هێزە لە سنووری شارۆچکەکانی هەرموشییە و جەزرە میلاج ڕوویانداوە و هاوکات لەگەڵ پێکدادانەکانیشدا هێزەکانی حکوومەتی سووریا و گرووپە چەکدارەکان دەستیان بەتۆپبارانکردنی شارۆچکەکانی هەرموشییە و بەکر لەژێر کۆنترۆڵی هەسەدەدا کردووە".

له‌به‌رامبه‌ر ئه‌وه‌شدا، هەسەدە لە شارۆچکەی حوایجەوە خاڵە سەربازییەکانی حکوومەتی سووریا و گرووپە چەکدارەکانیان لە شارۆچکەی بەقرەس لە ڕۆژئاوای ڕووباری فورات بە چەکی قورس بۆردوومانکردوە.

بەگوێرەی زانیارییەکانی ڕوانگەی سووری، هێزەکانی حکوومەتی سووریا و چەکدارانی دیفاع وەتەنی لەو هەوڵی پێشڕەویدان بەرەو ناوچەکانی ژێر کۆنترۆڵی هەسەدە و بەو هۆیەوە پێکدادانی نێوان هێزەکانی حکوومەتی سووریا و هەسەدە لەمدواییانەدا زیادیکردوە و ئێستا ڕۆژانە هێرش ‌و پێکدادان لەنێوانیاندا ڕوودەدات.