بەپێی هەواڵی کوردپرێس، وەزیری دەرەوەی تورکیا لە کۆنگرەیەکی رۆژنامەوانیدا لە کۆتایی کۆڕبەندی دیپلۆماسی ئەنتالیا زیاتر لەمبارەوە وتی: لەگەڵ سێرگی لاڤرۆڤ وەزیری دەرەوەی ڕووسیا، دۆسیەی سووریایان تاوتوێ کردووە.

ناوبراو زیاتر وتی: "پێویستە بە وردی قسە لەسەر ئەو پرسانە بکەین کە پەیوەندییان بە دۆسیەی سووریاوە هەیە؛ گەڕانەوەی ئاوارەکان و نووسینەوەی دەستوورێکی نوێ و شتی تر، هەموویان بابەتی هەڵپەسێردراون و پێویستیان بە کات هەیە".

شایانی باسە دوو ڕۆژ لەمەوبەر، سێرگی لاڤرۆڤ، وەزیری دەرەوەی ڕووسیا، ئاساییبوونەوەی نزیکبوونەوەی پەیوەندییەکانی نێوان سووریا و تورکیای ڕەتکردەوە و ڕایگەیاندبوو، بەهۆی دۆخی غەززەور، ئێستا ئاساییکردنەوە مەحاڵە.

پێش ئەوە میدیاکانی ڕووسیا بە پشتبەستن بە سەرچاوەکانی سەرۆکایەتی تورکیا، ڕەتیانکردەوە هیچ دیدارێکی داهاتووی نێوان بەشار ئەسەد، سەرۆککۆماری سووریا و ڕەجەب تەییب ئەردۆغان، هاوتا تورکەکەی ئەنجام بدرێت.