بەپێی هەواڵی کوردپرێس، سه‌رۆکایه‌تیی هه‌رێمی کوردستان هێرشه‌که‌ی سه‌ر هه‌ولێر سه‌رکۆنه ده‌کات و لە دەقی پەیامەکەدا هاتووە:
زۆر به توندی سه‌رکۆنه‌ی ئه‌و هێرشه دوژمنکارییه ده‌که‌ین که سوپای پاسدارانی ئێران شه‌وی ڕابردوو به مووشه‌کی دوورهاوێژ کردیه سه‌ر هه‌ولێر و له ئه‌نجامدا ژماره‌یه‌ک هاووڵاتی شه‌هید و بریندار بوون. سه‌ره‌خۆشی له خانه‌واده و که‌سوکاری شه‌هیدان ده‌که‌ین، هاوسۆز و هاوخه‌میانین و هیوای زووچاکبوونه‌وه بۆ برینداران ده‌خوازین.
به‌رده‌وامیی به‌ئامانجگرتنی هه‌رێمی کوردستان و شه‌هیدکردنی هاووڵاتییان، تاوانکارییه‌کی بێ پاساو و دژ به یاسا نێوده‌وڵه‌تییه‌کان و دراوسێیه‌تی و به‌ها مرۆیییه‌کانه، هه‌روه‌ها پێشێل‌کردنێکی زه‌قی سه‌روه‌ری و ئارامی و سه‌قامگیریی عێراقه. هه‌رێمی کوردستان هه‌رگیز بۆ هیچ لایه‌نێک سه‌رچاوه‌ی هه‌ڕه‌شه نه‌بووه و نابێت.
به‌هانه‌ی سوپای پاسدارانی ئێران بۆ هێرشه‌که به ته‌واوی بێ بنه‌ما و دووره له ڕاستییه‌وه، بۆیه داوا له حکوومه‌تی فیدراڵیی عێراق ده‌که‌ین به‌په‌له ده‌ست به لێکۆڵینه‌وه بکات بۆ ده‌رخستنی ڕاستییه‌کان، هه‌روه‌ها ئه‌رکی خۆی له پاراستنی هه‌رێمی کوردستان به‌جێ بگه‌یه‌نێت و ڕێ له‌و هێرشانه بگیرێت.
Your Comment