بەپێی هەواڵی کوردپرێس، دژی کەمیی کارەبا خۆپیشاندانی دانیشتووانی خەلەکان لە سنووری دوکان لە سلێمانی دەستی پێکرد و داوای چاک‌کردن و زیادکردنی کاتەکانی پێدانی کارەبای نیشتیمانی دەکەن.

خۆپیشاندانی دانیشتوانی خەلەکان لەکاتێکدایە، ڕۆژی رابردوو چاوگێک لە کۆنتڕۆڵى کارەباى هەرێم بە ئێن ئاڕ تی راگەیاند، وێستگەکانى بەرهەمهێنانى کارەبا کوژێندراونەتەوە و تەنها ئەو وێستگانە کاریان پێکراوە کە کارەبایان بۆ موسڵ و شارەکانى دیکەى عێراق بەرهەمهێناوە.

هاوکات، دواى تێپەڕبوونى دوو رۆژ لە کوژانەوەى گشتى کارەبا هێشتا دۆخى کارەباى نیشتیمانى ئاسایی نەبووەتەوە و تا ئێستا لە بەشێکى ناوچەکانى هەرێم کەمتر لە چوار کاتژمێر کارەبا دەدرێت بە خەڵک.

لەلایەکی دیکەوە، هەرێم نزیکەى یەک لەسەر سێى کارەباکەى دەفرۆشێت بە مووسڵ و چەند ناوچەیەکى دیکەى عێراق و لە پلانیدایە ئاستی فرۆشتن بەرز بکاتەوە بۆ هەزار و ٥٠٠ مێگاوات هەر مێگاواتێکیش بە ٣٢ دۆلار دەفرۆشێت بە بەغدا، لەکاتێکدا، هاوڵاتییانی هەرێم خۆیان کارەبای نیشتیمانییان پێنادرێت و لە هەولێری پایتەخت رۆژانە تەنها ٤ کاتژمێر کارەبا هەیە.