بەپێی هەواڵی کوردپرێس، عەبدول سەلام بەرواری، ئەندامی شاندی دانوستانکاری پارتی بۆ گفتوگۆ کردن لەسەر یاسای هەڵبژاردنی پەرلەمانی کوردستان لەگەڵ لایەنەکان، بە دەنگی ئەمریکای ڕاگەیاندووە: "دادگای فیدراڵی عێراق دەیەوێت بڕیارێک دەربکات نەبێتە هۆی پەکخستنی هەڵبژاردن، بۆیە ڕەنگە هەڵبژاردنی پەرلەمانی کوردستان لە مانگی ۲ ی ساڵی داهاتوو ئەنجام بدرێت."

فراکسیۆنی یەکێتی لە خولی پێنجەمی پەرلەمانی کوردستان، لە ڕۆژی ۲ ی مانگی پێنجی ۲۰۲۳، لە دادگای فیدراڵی عێراق سکاڵای لەسەر یاسای هەڵبژاردنی پەرلەمانی کوردستان تۆمار کردووە. یەکێتی داوا دەکات هەڵبژاردنی پەرلەمان لەیەک بازنەییەوە بگۆڕێت بۆ چوار بازنەیی و کورسی پێکهاتەکانیش بەسەر بازنەکاندا دابەش بکرێت.

عەبدولسەلام بەرواری دەڵێت: "گەر دادگای فیدراڵی یاسای هەڵبژاردن بە نادەستوری ناوببات کەواتە یاساکە بە کەڵکی هەڵبژاردن نایەت. بۆیە ڕەنگە بڕیارێکی وا دەربکات گەر یاساکەش بە نادەستوری ناوببات، بڵێت پێویستە پەرلەمانی داهاتووی کوردستان لە دانیشتنی یەکەمیدا هەمواری بکاتەوە، تا مەسەلەکە ڕێگر نەبێت لەبەردەم هەڵبژاردندا."

بڕیارە دادگای فیدراڵی عێراق، ڕۆژی ۱۹ ی یازدەی ۲۰۲۳، بۆ بڕیاردان لەسەر سکاڵاکەی فراکسیۆنی یەکێتی لەسەر یاسای هەڵبژاردنی پەرلەمانی کوردستان کۆ ببێتەوە و سکاڵاکە یەکلایی بکاتەوە.

پێشتر سەعدی پیرە وتەبێژی فەرمی یەکێتی نیشتمانی، وتی: "یەکێتی سوورە لەسەر سکاڵاکەی لەسەر یاسای هەڵبژاردن و چاوەڕوانی بڕیاری دادگای فیدراڵی عێراقین."

یەکێک لەو مادانەی یاسای هەڵبژاردنی پەرلەمانی کوردستان کە فراکسیۆنی یەکێتی سکاڵای لەسەر تۆمارکردووە ژمارەی ئەندامانی پەرلەمانی کوردستانە، گەر دادگای فیدراڵی بڕیار لە بەرژەوەندی فراکسیۆنی یەکێتی بدات، ئەوا ژمارەی ئەندامانی پەرلەمان لە ۱۱۱ کورسییەوە بۆ ۱۰۵ کورسی کەمدەکرێتەوەو کورسی کۆتای تورکمانیش نامێنێت.

بەرپرسانی لایەنە تورکمانییەکان، هۆشداری دەدەن لە لابردنی کورسییە کۆتاکانیان و داوا لە لایەنە کوردییەکان دەکەن لە بری ئەوان بڕیار نەدەن.

عەبدول سەلام بەرواری وتی: "لابردنی کورسی تورکمان بۆ هەرێم خراپە، چونکە ژمارەی تورکمان لە ئاشووری و پێکهاتەکانی تر زیاترە. گەر بوترێت ئاشوری کەمینەی ئاینییە، بەڵام کاتی خۆی لەسەر بنەمای نەتەوەیی کورسی کۆتایان بۆ دانراوە."

ناوبراو هەروەها وتیشی: "لە عێراق لەسەر بنەمای کەمایەتی ئاینی کورسی کۆتا دانراوە، بەڵام لە ساڵی ۱۹۹۲ ئەوە چەسپێنراوە کە کەمایەتییە نەتەوەییەکان لە هەرێم بۆیان هەیە لیستی تایبەت بە خۆیان هەبێت. بۆیە دەبێت هەموو لایەنەکان هەوڵ بدەن نوێنەری پێکهاتەکان لە پەرلەمان هەبن."

سەرۆکایەتی هەرێمی کوردستان، ڕۆژی ڕۆژی ۲۵ ی مانگی ۲ ی ساڵی داهاتووی وەکوو وادەی هەڵبژاردنی پەرلەمانی کوردستان دیاری‌کردووە.

نێچیرڤان بارزانی سەرۆکی هەرێمی کوردستان، لە ڕۆژی ۷ ی مانگی یازدە، دوای تەواوبوونی کۆبوونەوەی نێوان حزبەکەی لەگەڵ یەکێتی، هیوای خواست هەڵبژاردنی پەرلەمانی کوردستان لە وادەی خۆیدا ئەنجام بدرێت.