بەپێی هەواڵی کوردپرێس، میدیای بەریتانیی تێلێگراف بڵاوی کردەوە، حکوومەت بەنیازی ئامادەکردنی پلانێکە کە دەکرێت جێبەجێ‌کردنەکەی ببێتە هۆی ئەوەی کۆچبەرانی نایاسایی خەڵکی هەرێمی کوردستان، تورکیا و میسر ڕاستەوخۆ دیپۆرتی وڵات و هەرێمی خۆیان بکرێنەوە.

بەریتانیا لیستی وڵاتانی سەلامەتی هەیە و ئەگەر ناوی وڵات و هەرێمێک لەنێو ئەو لیستەدا بێت، ئەو کاتە حکوومەت ڕاستەوخۆ کۆچبەرانی ئەو وڵات و هەرێمانەی ناویان لەنێو لیستەکەدا هەیە، دیپۆرتی شوێنی خۆیان دەکاتەوە.

بەگوێرەی ئاماری حکوومەتی بەریتانیا، کۆچبەرانی هەرێمی کوردستان، تورکیا و میسر لە زۆرترین ئەو کۆچبەرانەن ئەمساڵ لە رێگەی دەریاوە و بەشێوەیەکی نایاسایی چوونەتە ئەو وڵاتە، بە جۆرێک لەسەرەتای ئەمساڵەوە لانیکەم 4 هەزار کۆچبەری خەڵکی هەرێمی کوردستان، تورکیا و میسر چوونەتە بەریتانیا.