بەپێی هەواڵی کوردپرێس، خستنەخوارەوەی درۆنێکی تورکیا لە ناوچەی ژێر کونترۆڵی کوردەکانی سووریا لەلایەن ئەمریکاوە کە لە هێرشەکەی ۱۰ ڕۆژ بەرلە ئێستای تورکیا بۆسەر ناوچەکانی کوردستانی سووریا ڕوویدا، خاڵێکی وەرچەرخان بوو لەبارەی ناوکۆکییەکانی ئەمریکا و تورکیا لەسەر کوردی سووریا.

ئەلکساندیر مەک‌کیور، چاودێری بابەتەکانی باکووری ڕۆژهەڵاتی سووریا لە گفتوگۆ لەگەڵ کوردپرێسدا ئاشکرای کرد ئەو درۆنەی کە لە لە نزیکیی بنکەی هێزە ئەمریکییەکان ژێرخانە ئابوورییەکانی کوردستانی سووریای بۆردوومان دەکرد لەلایەن دەزگای هەواڵگریی تورکیاوە کونترۆڵ دەکرا نەک سوپای ئەو وڵاتە.

ناوبراو لە وەڵامی ئەم پرسیارەدا کە ئایا ئەو هەڵمەتەی ئەمریکا بە مەبەستی بەرگری کردن لە کوردەکانی سووریا هەمبەر تورکیا بووە یان نا، وتی: من وابیر ناکەمەوە کە خستنەخواری درۆنە تورکییەکە لەلایەن ئەمریکاوە کاردانەوەیەک بێت بۆ هێرشە بەربڵاوەکانی تورکیا بۆسەر هێزەکانی سووریای دیموکرات. بەڵکوو ئەو درۆنە زۆر نزیکی بنکەی سەربازیی هێزە ئەمریکییەکان کەوتبوویەوە، هەر ئەمەش بووە هۆی ئەوەی کە ئەمریکا پێوەندیی بە سوپای تورکیاوە بکات کە ئەو درۆنە لەو ناوچەیە دوور بخاتەوە.

مەک‌کیور زیاتر وتی: بەگوێرەی ڕاپۆرتەکان ئەو درۆنە هۆشدارییەکانی ئەمریکای لەلاوە گرینگ نەبووە، ڕەنگە بەهۆی ئەوەی کە ئەو درۆنە نەک لەلایەن سوپای تورکیا بەڵکوو لەلایەن دەزگای هەواڵگریی ئەو وڵاتەوە کونترۆڵ دەکرا، هەر ئەمەش بوو بە هۆی ئەوەی کە ئەمریکییەکان درۆنەکە بخەنە خوارەوە.