بەپێی هەواڵی کوردپرێس، وه‌زاره‌تی سامانه‌ سروشتییه‌كانی حكوومه‌تی هه‌رێمی كوردستان له‌ به‌یاننامه‌یه‌كدا باسی له‌وه‌كردوه‌، "شه‌وی رابردوو كاتژمێر ۹:۳۰ بە چەند مووشەکێک هێرش کرایە سەر کێڵگەی گازیی کۆرمۆڕ؛ خۆشبەختانە هێرشە مووشەكییەكە هیچ زیانێكی گیانی و ماددیی لێنەكەوتوەتەوە".

ئاماژه‌ی به‌وه‌ش كردوه‌،  وەزیری سامانە سروشتییەكان (بە وەكالەت) راستەوخۆ لەگەڵ بریكاری وەزارەتی سامانە سروشتییەكان و تیمی وەزارەت و لایەنە ئەمنییەكان لەسەر هێڵە و بە هەماهەنگی لەگەڵ کۆمپانیای دانەغاز بەدواداچ.ونی دۆخەکە دەکات تا کاریگەریی لەسەر بەرهەمهێنانی غاز و کارەبا نەکات.

ئەوە یەکەمجار نیە کە کێڵگەی غازی کۆرمۆر لە ناحیەی قادرکەرەم بۆردوومان دەکرێت، لە ماوەی رابردووشدا چەند جارێک کراوەتە ئامانج و تائێستا هیچ لایەنێک بە فەرمی بەرپرسیارێتی خۆی لە هێرشەکان رانەگەیاندووە.