بەپێی هەواڵی کوردپرێس، پەدەکەسە، کۆنترین پارتی سیاسی کوردییە لە کوردستانی سووریا، کە لە ساڵی ۱۹۵۷وە وەک یەکەمین پارتی کوردستانی لە کوردستانی سووریا دامەزراوە.

بە گوێرەی بەرنامەکانی پارتەکە، بڕیارە نزیکەی ۲۰۰ ئەندام کە ۴۹یان ئەندامی سەرکردایەتیی پەدەکەسەن، لە کۆنگرەکەدا بەشداربن کە سەر بە هەرێمەکانی جزیرێ، کۆبانێ و عەفرینی کوردستانی سووریا و شارەکانی دیمەشق و حەڵەبی سووریان.

هەروەها نوێنەری پەنابەرانی کوردستانی سووریا لە هەرێمی کوردستان، کوردستانی تورکیا و ئەورووپاش لە کۆنگرەکەدا بەشدار دەبن.

بە گوتەی لێدوانی بەرپرسێکی پارتەکە، دەبوو کۆنگرەکە دوو تا سێ ساڵ و نیو دوای کۆنگرەکەی پێشووی هەولێر، ببەسترێت، بەڵام بەهۆی داعش، ناکۆکییەکانی نێو پارتە کوردییەکان و داخستنی نووسینگەی پارتە سیاسییەکان و ناڕوونیی دۆخی جیهانەوە، دواکەوتووە.

دوایین کۆنگرەی "پەدەکەسە" لە نیسانی ۲۰۱۴ لە شاری هەولێری پایتەختی هەرێمی کوردستان بەستراوە.