کوردپرێس
لە چەند ڕۆژی ڕابردوودا چەند هەواڵێک کە باسیان لەمە دەکرد کە گوایە هێزه‌كانى پێشمه‌رگه‌ى پارتى سۆسیالیست دیموكراتى كوردستان خراونەتە سه‌ر هێزه‌كانى پێشمه‌رگه‌ى زێره‌ڤانى لە میدیاکانی هەرێمی کوردستاندا بڵاو کرانەوە. فەرهاد تەوفێق ئەندامی مەکتەبی سیاسیی حیزبی سۆسیالیست دیموکراتی کوردستان لەبارەی ئەم هەواڵانەوە بە هەواڵنێری کوردپرێسی وت: تا ئێستا هیچ زانیارییەکی فەرمی لەم بارەیەوە بڵاو نەکراوەتەوە؛ بەڵام بێ گومان پێویستە هێزەکانی پارتی سۆسیالیستی کوردستان لە ڕیزەکانی هێزی پێشمەرگەدا هەژمار بکرێن و لەژێر چاودێری وەزارەتی پێشمەرگەدا بن؛ چوونکە هەمیشە پێش خەباتی کورد و دوای ئەوەش ئەم هێزانە پێشەنگی بەرەکانی شەڕ بوون.
فەرهاد تەوفێق جەختی کردەوە کە ئێستا بەشێک لە هێزەکانی پارتی سۆسیالیستی کوردستان خانەنشین کراون و پێویستە هەم هێزە خانەنشینەکان و هەم هێزە چالاکەکانمان بخرێنە ژێر دەسەڵاتی وەزارەتی پێشمەرگە.
ناوبراو ڕوونیشی کردەوە، کاتێک کە یاسای چاکسازیی وەزارەتی پێشمەرگە پێشنیار کرا، ژمارەیەک لە ئەندامانی هێزی پارتی سۆسیالیستی کوردستان خرانە سەر هێزەکانی پێشمەرگە، بەڵام پێویستە هەموو ئەو هێزانە لەسەر وەزارەتی پێشمەرگە بن. کاتێک هێزەکانی ٧٠ و ٨٠ی پارتی دیموکراتی کوردستان و یەکێتیی نیشتمانیی کوردستان ڕێکخران، بەشێک لە هێزەکانی حیزبی سۆسیالیستیش لەگەڵ هێزی پێشمەرگەی هەرێمی کوردستان یەکخران.
فەرهاد تەوفێق زیادی کرد، پێویستە هێزه‌كانى پارتى سۆسیالیست دیموكرات هاوشێوەی هێزەکانی ٧٠ و ٨٠ی پارتی دیموکراتی کوردستان و یەکێتیی نیشتمانیی کوردستان یەکبخرێن.
Your Comment