بەپێی هەواڵی کوردپرێس، ئەمڕۆ شەممە سەرۆک کۆماری عێراق لە فڕۆکەخانەی میهراباد لە تاران لەلایەن ئیحسان خاندوزی، وەزیری دارایی و ئابووری ئێرانەوە پێشوازیی لێکراوە و هەروەها ئەنسیە خەزعەلی، یاریدەدەری سەرۆک کۆمار بۆ کاروباری ژنان پێشوازی لە شاناز ئیبراهیم ئەحمەد، خانمی یەکەمی عێراق کرد.

دوابەدوای ئەوە سەرۆک کۆماری عێراق بەرەو کۆشکی سەعدئاباد بەڕێکەوت و لەوێ لەلایەن ئیبراهیم رەئیسی، سەرۆک کۆماری ئێرانەوە بەڕێوڕەسمێکی رەسمی پێشوازیی لێکراوە.

هەر لەمبارەوە سەرۆکایەتی کۆماری عێراق راگەیەندراوێکی بڵاو کردەوە و ڕایگەیاند لەتیف ڕەشید بە یاوەریی شاندێک کە پێک هاتووە لە فواد حسێن، وەزیری دەرەوەو زیاد عەلی فازڵ، وەزیری کارەبا و عەبد عەون زیاب، وەزیری سەرچاوە ئاوییەکان و قاسم ئەعرەجی، راوێژکاری ئاسایشی نیشتمانی لەگەڵ ژمارەیەک لە راوێژکاران و گەورە بەرپرسانی عێراق گەیشتە تاران.

سەرۆکایەتی کۆماری عێراق ڕاشیگەیاندووە سەردانەکەی لەتیف رەشید لەسەر بانگهێشتی رەسمی سەرۆک کۆماری ئێران بووە.

لەتیف رەشید لە پۆستی سەرۆک کۆماردا بۆ یەکەمجارە سەردانی ئێران دەکات.