کوردپرێس:

بەڵگە فیلمی نانی پیرۆز (Holy Bread) دوایین بەرهەمی خوالێخۆشبوو ڕەحیم زەبیحییە کە توورەج ئەسڵانی کاری پرادسیۆریی بۆ کردووە و فیلمەکەش لە بەشی سەرەکیی خولی 69یەمی فستیڤاڵی نێودەوڵەتیی فیلمی "تۆرنتۆ"ی ئیتاڵیا وەرگیرا.

ئەوە چوارەم ئەزموونی بەشداری کردنی بەڵگە فیلمەکەی زەبیحی لە فستیڤاڵە نێودەوڵەتییەکانە و ئەم جارە لەگەڵ 13 فیلمی دیکە لە وڵاتانی جۆربەجۆری جیهان بۆ بەدەستهێنانی میداڵیای زێڕی ئەو فستیڤاڵە بڕواپێکراوە سینەمایییەی جیهان ڕکابەری دەکات.

فستیڤاڵی نێودەوڵەتیی فیلمی تۆرنتۆ کۆنترین ڕووداوی سینەماییی ئەورووپایە کە لە سەر تەوەری چیا و سروشت و گەڕان و دۆزینەوە دەگەڕێت. لە خولی 69ی ئەو فستیڤاڵە بە نمایش کردنی 100 بەرهەم لە دەرهێنەرانی وڵاتانی جیهان لە 8 تەوەردا ڕکابەری دەکرێت و 19 بۆ 26ی گوڵانی ئەمساڵ واتا 9 بۆ 16ی مانگی مەی 2021 بە هۆی پەتای کۆرۆناوە بە شێوەی ئۆنلاین لە شاری تۆرنتۆی باکووری ئیتاڵیا بەڕێوە دەچێت.