«فواد عەلیکۆ» ئەندامی لیژنەی ناوەندیی پارتی یەکێتیی کوردستانی سووریا (P.Y.K.S) لەگفتوگۆ لەگەڵ کوردپرێسدا ئاماژەی دا بە ڕێگای چارەسەر کردنی کێشەکانی نێوان پارتی کرێکارانی کوردستانی تورکیا (پەکەکە) و پارتی دیموکراتی کوردستانی عێراق (پارتی) و وتی: هەرێمێک هەیە بە ناوی هەرێمی کوردستان و بەشێکە لە عێراق. بۆیەش نە پەکەکە مافی هەیە و نە هیچ حزبێکی دیکە خۆی بە خاوەنی ئەم ناوچەیە بزانێت و لەشکەرکێشی بکات و لەو ناوچەدا بنکە و بارەگا بکاتەوە.

ناوبراو درێژەی دا: ناوچەیێک کە دەبێت پەکەکە چالاک بێت کوردستانی تورکیایە و دەبێت بۆ ئەوێ بگەرێتەوە و هەر ئیدیعایێکی هەیە لە بارەی خاکی هەرێمی کوردستانەوە نادروستە و قبووڵکراو نییە.

ئەندامی لیژنەی ناوەندیی پارتی یەکێتیی کوردستانی سووریا زیادی کرد: ململانێی نێوان پەکەکە و پارتی ڕووداوێکی نوێ نییە و پێشتریش پێکدادان لەنێوانیاندا ڕووی داوە ئەوەش بەبۆنەی هەڵمەتە نابەجێکانی پەکەکەوەیە.

فواد عەلیکۆ جەختی کردەوە کە دەبێت سەرکردەی ئەم دوو لاینە پێکەوە گفتوگۆ بکەن و سنوورێک دیاری بکرێت بۆ چالاکییەکانی پەکەکە.

ئەندامەکەی لیژنەی ناوەندیی پارتی یەکێتیی کوردستانی سووریا (P.Y.K.S) تەئکیدی کردەوە: ڕۆژگارێکی تاریک لە بەردەم پارتی و پەکەکە-دایە، ئەگەر سنوورێک بۆ پاوانخوازی و هەڵمەتەکانی پەکەکە لە هەرێمی کوردستان دیاری نەکرێت.

کۆدی هەواڵنێر: 60113