بەپێی هەواڵی کوردپرێس، گۆڤاری ئۆنلاینی پرۆگرێس لە هۆڵەندا لە ڕێگای ڕاپۆرتێکەوە باسی لە پرۆسەی سەربەخۆیی خوازی لەم چەند ساڵەی دواییدا کردووە و لە بەشێکی ڕاپۆرتەکەشدا تیشکی خستۆتە سەر هەوڵی کوردەکانی عێراق بۆ بەڕێوەبردنی ڕێفراندۆم لە ساڵی ٢٠١٧ بە مەبەستی سەربەخۆیی و جیا بوونەوە لە عێراق.

گۆڤارەکە ئاماژە دەکاتە دەرهاویشتە و دەرەنجامە نالەبارەکانی ڕێفراندۆم بۆ کوردەکانی عێراق و قەیرانی ئابووری و سیاسی لە ناوچەکە و دەشڵێت: کوردی عێراق ناتوانن بڕیارێکی هاودەنگ بۆ چارەنووسی خۆیان و جیا بوونەوە لە عێراق بدەن چوونکە پێکەوە ناکۆکیی سیاسی، ئابوورییان هەیە و جاری وایە گوفتمان و ڕێبازیشیان یەک ناگرێتەوە و هەر ئەمانەش کۆسپ و لەمپەرن بۆ ئەوەی کوردەکانی عێراق لەسەر یەک بڕیار کۆ ببنەوە.

پرۆگرێس دەشنووسێت: دژبەرانی سەربەخۆیی دەڵێن مانەوە لەگەڵ عێراق هەم باشییەکانی خاوەن وڵات بوونیان پێدەبەخشێت و هەم زیان و خەسارەکانی وڵاتێکی سەربەخۆیان لێ دوور دەکاتەوە. بۆ وێنە سەعد سەلووم شرۆڤەکاری عێراقی دەڵێت: لەگەڵ سەرۆکی هەرێمی کوردستان وەکوو سەرۆک‌کۆمارێک مامەڵە دەکرێت و هاتوچۆ بۆ هەرێمی کوردستان پێویستی بە شتێک هاوشێوەی ڤیزا و پەساپۆرت هەیە و هاوکات بووجەکەشی لە حکوومەتی فیدراڵ وەردەگرێت.

کۆدی هەواڵنێر: ٦٠١٠٥