به‌پێی هه‌واڵی کوردپرێس، ڕۆژی ڕابردوو ئه‌نجومه‌نی ئاسایشی نیشتمانیی تورکیا به‌ سه‌رۆکایه‌تیی ڕه‌جه‌ب ته‌ییب ئه‌ردۆغان سه‌رۆک کۆماری ئه‌و وڵاته‌ کۆ بوویه‌وه‌ و ڕای‌گه‌یاند: جووڵه‌ کردن به‌ هێزی سه‌ربازیی تورکیا وه‌کوو چاودێر له‌ عه‌فرین و ڕۆژئاوای حه‌ڵه‌ب به‌ مه‌به‌ستی گه‌ره‌نتی کردنی ئاشته‌وایی و ئاسایشی ئه‌و ناوچه‌یه‌ ده‌بێت.

به‌یاننامه‌ی کۆتاییی دانیشتنی ئه‌نجومه‌نی ئاسایشی نیشتمانی ئه‌وه‌شی ڕاگه‌یاندووه‌: ڕۆڵی سه‌ربازه‌ تورکه‌کان له‌ ناوچه‌ ئارامه‌کاندا به‌رچاوه‌ و ئه‌وه‌ش ده‌توانێت نیشانه‌یێک بێت بۆ ده‌ست پێکردنی جووڵه‌ی سه‌ربازیی دیکه‌ له‌ داهاتوودا.

ئه‌نجومه‌نه‌که‌ جه‌ختیشی کردۆته‌وه‌ تورکیا بۆ دابین کردنی ئاسایشی سنووره‌کانی خۆی هه‌ر چی پێویست بێت ده‌یکات.

له‌ به‌یاننامه‌که‌دا ئه‌وه‌ش نووسراوه‌: پارتی یه‌کێتیی دیموکراتیک (PYD) که‌ سه‌ر به‌ پارتی کرێکارانی کوردستان (PKK)یه‌ هه‌وڵ ده‌دات پێکهاته‌ی قه‌ومیی سووریا بگۆڕێت و له‌ ڕێگای پاکتاو کردنی قه‌ومی و پێشێل کردنی یاسا و په‌یڕه‌وی نێوده‌وڵه‌تی و مافی مرۆڤ خاکێکی زیاتر داگیر بکات و ئه‌وه‌ش لای ئێمه‌ قبووڵ ناکرێت.

سه‌رچاوه‌: ده‌یلی سه‌باح

کۆدی هه‌واڵنێر: 60103