به‌پێی هه‌واڵی کوردپرێس، مه‌سعوود که‌رباسیان پاش نیوه‌ڕۆی ڕۆژی یه‌کشه‌ممه‌ له‌ دانیشتنی سیتادی قه‌یرانی پارێزگای کرماشان به‌ ئاماده‌بوونی سه‌رۆکی په‌رله‌مانی ئێران وتی: وه‌زاره‌تی ئابوور و دارایی پڕۆژه‌ په‌سه‌ندکراوه‌کانی ده‌سته‌ی وه‌زیرانی ڕاده‌ستی بانکه‌کان کردووه‌ و پڕۆسه‌ی جێبه‌جێ کردنیشی ئه‌نجام ده‌بێت.

ناوبراو جه‌ختی کرده‌وه‌: بانکه‌کان نابێت ڕه‌وتی جێبه‌جێ کردنی یاسا په‌سه‌ندکراوه‌کانی ده‌سته‌ی وه‌زیران سه‌باره‌ت به‌ بوومه‌له‌رزه‌ی کرماشان دوا بخه‌ن.

به‌ گوێره‌ی ڕاپۆرته‌کانی هه‌واڵده‌ریی ده‌وڵه‌ت له‌و کۆبوونه‌وه‌یه‌دا وه‌زیری ئابوور و دارایی داوای له‌ بانکه‌کان کرد ئاسانکاری بۆ پێدانی قه‌رزه‌ بانکییه‌کان بکه‌ن و ناوچه‌ لێقۆماوه‌کانی بوومه‌له‌رزه‌ش له‌ پێدانی باجدا چاوپۆشییان لێ بکرێت.

شیاوی ئاماژه‌یه‌؛ کۆبوونه‌وه‌ی سیتادی قه‌یرانی پارێزگای کرماشان پاش نیوه‌ڕۆی ڕۆژی یه‌کشه‌ممه‌ به‌ به‌شداریی سه‌رۆکی په‌رله‌مانی ئێران و وه‌زیرانی وزه‌ و ئابوور و سه‌رۆکی ڕێکخراوی خانووبه‌ره‌ و چه‌ندین به‌رپرسی باڵای دیکه‌ له‌ هۆڵی شوهه‌دای ده‌وڵه‌تی ئیداره‌ی پارێزگاری به‌ڕێوه‌ چوو.

کۆدی هه‌واڵنێر: 60103