به‌پێی هه‌واڵی کوردپرێس، سه‌عد حه‌دیسی له لێدوانێک بۆ هه‌واڵده‌ریی "عین العراق نیوز" ده‌ڵێت: ئێمه ئاگاداری ئه‌وه نین که فڕۆکه سه‌ربازییه‌کانی عێراق ڕاگه‌یاندنی دژ به ڕیفراندۆمیان له ناوچه جێناکۆکییه‌کان بڵاو کردبێته‌وه چوونکه ئه‌و فڕۆکانه ته‌نیا ئه‌و ڕاگه‌یێندراوانه بڵاو ده‌که‌نه‌وه که بریتین له ڕێنمایی و هه‌ندێ زانیاری و داتا بۆ هێزه سه‌ربازییه‌کانی ئه‌و ناوچانه که له‌گه‌ڵ گرووپی داعشدا خه‌ریکی شه‌ڕن.
حه‌دیسی پاشان وتیشی: فڕۆکه سه‌ربازییه‌کانی عێراق چه‌ند ڕۆژ پێش ئێستا ده‌ستیان داوه‌ته بڵاوکردنه‌وه‌ی تاقمێک ڕاگه‌یێندراو له ئاسمانی شاری حه‌ویجه له باشووری ڕۆژئاوای که‌رکووک که بریتی بووه له زانیاری و ڕێنمایی بۆ خه‌ڵکی ئه‌و شاره ئه‌وه‌ش له‌پێناو پاراستنی گیانی خۆیان.
شیاوی ئاماژه‌یه؛ ڕۆژنامه‌ی "العربی الجدید"ی له‌نده‌ن پێشتر له‌مه باسی له‌وه کردبوو که ده‌وڵه‌تی عێراق ڕاگه‌یێندراوی دژ به ڕیفراندۆم له ناوچه جێناکۆکییه‌کاندا بڵاو ده‌کاته‌وه و به‌م شێوه‌یه‌ش کاردانه‌وه و دژه‌هێرشی خۆی هه‌مبه‌ر گشتپرسیی سه‌ربه‌خۆیی له هه‌رێمی کوردستان ده‌ست پێکردووه.
کۆدی هه‌واڵنێر: 60103
Your Comment