به‌پێی هه‌واڵی کوردپرێس، ئه‌رشه‌د ساڵحی له پرێس کۆنفڕانسێکدا ئاماژه‌ی به‌وه کرد ده‌بێ شاری حه‌ویجه ئازاد بکرێت و ڕای‌گه‌یاند: ئیداره‌ی پارێزگای که‌رکووک نابێت له به‌رده‌م ئۆپه‌راسیۆنی ئازادکردنه‌وه‌ی ئه‌و شاره له‌مپه‌ڕ بنێته‌وه.
ناوبراو جه‌ختی کرده سه‌ر ئه‌وه‌ی ده‌بێ ئیداره‌ی پارێزگای که‌رکووک و به‌غدا هه‌ماهه‌نگیی ئه‌منی له‌باره‌ی ئۆپه‌راسیۆنی ئازادکردنه‌وه‌ی حه‌ویجه‌وه ئه‌نجام بده‌ن و نابێت له‌م باره‌یه‌وه ناڕه‌زایی به ئۆپه‌راسیۆن و به‌رنامه و پلانه‌کانی ده‌وڵه‌تی ناوه‌ندی ده‌رببڕن.
ساڵحی وتیشی: هۆکاری داواکان بۆ وه‌لاوه‌نانی پارێزگاری که‌رکووک پرسی قه‌ومی نییه به‌ڵکوو هۆکاری ئه‌و داواکارییانه ناڕه‌زایی ده‌ربڕینه به هه‌ڵکردنی ئاڵای هه‌رێمی کوردستان له پارێزگای که‌رکووک و به‌ڕێوه‌چوونی گشتپرسی له‌و پارێزگایه‌دا.
ناوبراو ڕوو له کورده‌کانیش ده‌ری‌بڕی: "ئێمه تورکمانه‌کان دوژمنی ئێوه نین و دژ به ئێوه کار ناکه‌ین، ئێوه له سێ پارێزگای خۆتاندا چیتان پێ خۆشه بیکه‌ن به‌ڵام مافی ئه‌وه‌تان نییه له پارێزگای که‌رکووک کارێک ئه‌نجام بده‌ن."
سه‌رچاوه: هه‌واڵده‌ریی "الاتجاه‌پرس"
کۆدی هه‌واڵنێر: 60103
Your Comment