فەتحوڵڵا حسێنی ئەندامی نوێنەرایەتیی بەڕێوەبەریی خۆسەری باکوور و ڕۆژهەڵاتی سووریا لە هەرێمی کوردستان لە وەڵامی ئەم پرسیارەدا کە ئایا لە ساڵی نوێدا دانوستانی نێوان حزبەکانی یەکێتیی نیشتمانی کورد و ئەنجومەنی نیشتمانیی کورد دەست پێدەکاتەوە، وتی: پڕۆژەی دانوستانی نێوان حزبەکانی یەکێتیی نیشتمانی کورد(PYNK) و ئەنجومەنی نیشتمانیی (ENKS) پڕۆژەیێکە کە درێژەی هەیە بەڵام دیار نییە چ کاتێک دەست پێبکاتەوە.
ناوبراو درێژەی دا: قۆناخێکی باش لە دانوستانەکانمان تێپەڕاند و چاوەڕوانین کە ئەنەکەسە هەست بە بەرپرسیارێتی بکات و خۆی بۆ گفتوگۆکان ئامادە بکات.
فەتحوڵڵا حسێنی ڕاشیگەیاند: ئێستا پڕۆژەی سیاسی و ڕاستەقینە لە باکوور و ڕۆژهەڵاتی سووریا دەستی پێکردووە و ئەمان مافیان هەیە لەم پڕۆژەدا بەشدار بن.
ناوبراو وتیشی: ئەنجومەنی نیشتمانی نابێت وا بیر بکاتەوە کە فراکسیۆنێکی گەورەیە و دەبێت دەسەڵات لەگەڵیاندا دابەش بکرێت. ئیدارەی خۆسەر ڕاستیێکە کە بە خۆێنی خەڵکی باکووری سووریا دامەزراوە و هەموو حزب و ڕەوتەکان تێیدا ئامادەن و ئەنجومەنی نیشتمانیش دەتوانێت وەکوو حزبەکانی دیکە لەم ئیدارەیەدا بەشدار بێت.
ئەندامی نوێنەرایەتیی بەڕێوەبەریی خۆسەری باکوور و ڕۆژهەڵاتی سووریا لە هەرێمی کوردستان جەختی کردەوە: ئەگەر ئەنەکەسە ویستی دەتوانێت لەم ئیدارەیەدا ئامادە بێت و ئەگەریش نەیویست بەمانای ئەمەیە کە ڕێککەوتن لەگەڵ تورکیا ناهێڵێت ئەم ڕەوتە بەشداری لەم بەڕێوەبەرایەتییەدا لە کوردستانی سووریا بکات.
Your Comment