به‌پێی هه‌واڵی کوردپرێس، هۆشیار عه‌بدوڵڵا په‌رله‌مانتاری گۆڕان له‌ په‌رله‌مانی عێراق كه‌ هاوكات ئه‌ندامی لیژنه‌ی داراییی په‌رله‌مانیشه‌ له ‌توویتێكدا ئاماژه‌ی به‌ کێشه‌ی دابه‌ش‌کردنی مووچه‌ی فه‌رمانبه‌ران و مووچه‌خۆرانی هه‌رێمی کوردستان کرد و ڕای‌گه‌یاند: "چاره‌سه‌ر ئه‌وه‌یه‌ حکوومه‌تی فیدراڵ خۆی مووچه‌ی فه‌رمانبه‌رانی هه‌رێم دابه‌ش بکات."

ئه‌و په‌رله‌مانتاره‌ی گۆڕان وتیشی: "حکوومه‌تی هه‌رێم ده‌ستێکی ئه‌مین نییه‌ بۆ دابه‌ش کردنی مووچه‌."

ئه‌مه‌ش له‌ حاڵێکدایه‌ که‌ ڕۆژی دووشه‌ممه 27ی ئایاری 2019 ڕێباز حه‌ملان وه‌زیری دارایی و ئابووری هه‌رێم كۆنگره‌یێكی ڕۆژنامه‌وانی له‌باره‌ی مووچه‌ی فه‌رمانبه‌ران و بودجه‌وه‌ ساز كرد و وتی: "به‌غدا له‌ ساڵی 2018دا نۆ مووچه‌ی بۆ هه‌رێم ناردووه‌ كه‌ مانگانه‌ بڕی 317 ترلیۆن دینار بووه‌ و کۆی پاره‌که‌ زیاتر له‌ دوو ترلیۆن دینار بووه‌ و له‌ مانگی نیسانی ئه‌و ساڵه‌وه‌ نێردراوه‌، له‌گه‌ڵ داهاتی هه‌رێم به‌ پاشه‌كه‌وته‌وه‌ مووچه‌ی پێدراوه‌."

ناوبراو وتیشی: "له‌مساڵدا حکوومه‌تی‌ عیراق پێنج مووچه‌ی‌ بۆ هه‌رێم ناردووه‌ که‌ بریتی بووه‌ له‌ دوو ترلیۆن و 266 ملیار و 399 ملیۆن دینار، یه‌ک ترلیۆن و 835 ملیار دیناریش له‌لایه‌ن حکوومه‌تی‌ هه‌رێمه‌وه‌ خراوه‌ته‌ سه‌ری و دواتر مووچه‌ی‌ پێنج مانگی پێدراوه‌ که‌ سێ مانگی کۆتاییی 2018 بووه‌ و دوو مانگیشی له‌ ساڵی 2019 بووه‌."

له‌لایێکی دیکه‌شه‌وه‌ غاڵب محه‌مه‌د ئه‌ندامی بزووتنه‌وه‌ی گۆڕان له‌ په‌رله‌مانی عێراق حکوومه‌تی هه‌رێمی کوردستان به‌ ناشه‌فافییه‌ت له‌ به‌شه‌بودجه‌ی نێردراوی به‌غدا بۆ هه‌رێم تۆمه‌تبار کرد و ڕای‌گه‌یاند: دوو ترلیۆن و 600 ملیار دینار له‌ داهاتی چوار مانگی ڕابردووی هه‌رێم دیار نییه‌.

سه‌رچاوه‌: ئاوێنه‌

هه‌واڵی پێوه‌ندیدار:

http://www.kurdpress.com/ku/details.aspx?id=46082

کۆدی هه‌واڵنێر: 60103