به‌پێی هه‌واڵی کوردپرێس، ڕۆژی سێشه‌ممه 30ی نیسانی 2019 عادل عه‌بدولمه‌هدى سه‌رۆک وه‌زیرانى عێراق به سه‌رۆکایه‌تیی شاندێکی باڵای وڵاته‌که‌ی گه‌یشته ئه‌ڵمانیا و له‌گه‌ڵ ئه‌نگێلا مێرکڵ ڕاوێژکاری ئه‌ڵمانیا و به‌رپرسانى‌ترى ئه‌و وڵاته کۆ بوونه‌وه و دواتر کۆنفڕانسێکی ڕۆژنامه‌وانیی هاوبه‌شیان ساز کرد و عادل عه‌بدولمه‌هدى ڕایگهیاند که چه‌ند ڕێککه‌وتنێکیان له‌گه‌ڵ کۆمپانیاى سمینسى ئه‌ڵمانى به به‌هاى 14 ملیار دۆلار واژۆ کردووه بۆ جێبه‌جێ کردنى چه‌ندین پڕۆژه‌ى گه‌وره‌ی کاره‌با له عێراقدا و ڕاوێژکارى ئه‌ڵمانیاش داواکارییێکى عێراق له بوارى سه‌ربازیدا جێبه‌جێ ده‌کات.
ناوبراو ئاماژه‌ى به‌وه‌ش کرد: ئه‌ڵمانیا ڕۆڵى سه‌ره‌کى بینیوه له هاوکاری کردنى عێراق له شه‌ڕى تیرۆر و ئاوه‌دانکردنه‌وه‌ى ناوچه وێرانبووه‌کانى جه‌نگ و داواشى له‌و وڵاته کرد له هاوکارییه‌کانیان به‌رده‌وام بێت.
سه‌رۆک وه‌زیرانى عێراق ڕوونیشی کرده‌وه که ئه‌ڵمانیا هاوکاری مرۆیی و دارایی له‌پێناو ئاوه‌دانکردنه‌وه‌ی ناوچه‌کان و گه‌ڕانه‌وه‌ی ئاواره‌کان بۆ سه‌ر ماڵ و زێدی خۆیان پێشکه‌شی عێراق کردووه.
لاى خۆشیه‌وه مێرکڵ خۆشحاڵى خۆى به په‌یوه‌ندییه‌کانى وڵاته‌که‌ى له‌گه‌ڵ عێراق دووپات کرده‌وه و ڕایگهیاند: ده‌مانه‌وێت هاوبه‌شێکی ڕاسته‌قینه‌ی حکوومه‌تی عێراق بین له‌و نێوه‌نده‌شدا له پشتیوانییه‌کانمان بۆ به‌رژه‌وه‌ندیی گه‌لی عێراق به‌رده‌وام ده‌بین.
ڕاوێژکارى ئه‌ڵمانیا ئاشکراشى کرد: حکوومه‌تی عێراق داوای کردووه که هێزه‌کانمان له مه‌شق و ڕاهێنان پێکردنی هێزه ئه‌منییه‌کان به‌رده‌وام بن و جه‌ختی کرده‌وه وڵاته‌که‌ى به‌دڵنیاییه‌وه ئه‌وه‌ی له توانایاندا بێت له‌وباره‌یه‌وه ئه‌نجامی ده‌ده‌ن.
سه‌رچاوه: سۆمه‌ریه نیووز
کۆدی هه‌واڵنێر: 60103
Your Comment