فەرهاد تەلۆ سەرۆکی پارتی یەکێتیی لیبراڵی کوردستانی لە گفتوگۆ لەگەڵ کوردپرێسدا ئاماژەی دا بە پرسی بەفەرمی ناساندنی سەربەخۆیی دوو ناوچە لە خاکی ئۆکراینا و وتی: ڕووسیا بۆ بەرژەوەندیی خۆی پێچەوانەی یاسا نێودەوڵەتییەکان سەربەخۆیی دوو ناوچەی ڕووسنشینی کۆماری گەلی دۆنێتسک و کۆماری گەلی لوھانسک-ی بەفەرمی ناساند بەڵام لەلایێکی دیکەوە بەردەوام ڕایدەگەیێنێت کە کورد دەیهەوێت خاکی سووریا دابەش بکات، ئەمەش لە حاڵێکدایە کە بەرپرسانی ئیدارەی خۆسەر هیچ کاتێک نەیانوتووە بەنیازن لە سووریا جیا ببنەوە و بەردەوام داوای مافی خۆیان لە چوارچێوەی سووریا دەکەن.

ناوبراو درێژەی دا: ڕووسیا کاتێک دەبینێت ئیدارەی خۆسەر لە پرسی شەڕی تیرۆردا هاوکاریی هاوپەیمانان دەکەن دەیهەوێت ئەو ئیدارەیە ڕادەستی حکوومەتی ناوەندیی سووریا بکات و بەردەوامیش گوشار دەخاتە سەر بەرپرسانی باکوور و ڕۆژهەڵاتی سووریا.

ناوبراو لەبارەی هەڵویستی تورکیا بۆ ڕووداوەکانی ئۆکراینا وتی: تورکیا دەبێت لە کۆتاییدا هەڵویستی خۆی ڕوون کاتەوە چوونکە بەشێکە لە ناتۆ و ئەمەش ڕەنگە ببێتە هۆی نزیکبوونەوەی زیاتری ئەو وڵاتە لە ناتۆ و دوورکەوتنەوەی لە ڕووسیا، کە ئەمەش ناکۆکیی نێوان ڕووسیا و تورکیای لێدەکەوێتەوە.

ناوبراو ئاشکرای کرد، لە ئێستادا تورکیا مەترسییێکی گەورەیە لەسەر ئێمە و ئەگەر بیەوێت لەناتۆ نزیک کەوێتەوە و ئەم ئەگەرە لە ئارادایە کە ڕووسیا دان بە مافی کوردەکان لە سووریا بنێت.

فەرهاد تەلۆ وەبیری هێنایەوە: ئێمە نابێت خۆمان بەم شەڕەوە بتلێنین و یان ئەوەی لەدژی ڕووسیا نزیکی ناتۆ بکەوینەوە. چوونکە مومکینە شکستی ڕووسیا لە بەرژەوەندیی کوردەکاندا نەبێت و وڵاتانی ڕۆژئاوا لەسەر کوردەکان مامەڵە لەگەڵ تورکیا و وڵاتانی ناوچەکە بکەن.