کوردپرێس:
فازڵ میرانی سکرتێری مه‌کته‌بی سیاسیی پارتی دیموکراتی کوردستان ڕای‌گه‌یاندووه که به‌پێی یاسای هه‌موارکراوی سه‌رۆکایه‌تیی هه‌رێمی کوردستان پێده‌چێت جێگر و یاریده‌ده‌رێک بۆ سه‌رۆکی هه‌رێم دابنرێت و دوو جێگری نابێت.
ئه‌مه له حاڵێکدایه که بزووتنه‌وه‌ی گۆڕان و یه‌کێتیی نیشتیمانیی کوردستان داوای پۆستی جێگری سه‌رۆکی هه‌رێمی کوردستانیان کردووه و یه‌کێتییش پێشنیاری داوه که دوو جێگر بۆ ئه‌و پۆسته دابنرێت.
له‌وباره‌وه فازڵ میرانی ئاماژه‌ی به‌وه کرد: ئه‌وه‌ی گرنگه ڕێککه‌وتنی پارتی و یه‌کێتییه بۆ پێکهێنانی کابینه‌ی نوێی حکوومه‌تی هه‌رێم و لای ئه‌وان پۆست گرنگ نییه.
به‌پێی ڕێککه‌وتنی نێوان پارتی و بزووتنه‌وه‌ی گۆڕان پۆستی جێگری سه‌رۆکی هه‌رێم به گۆڕان دراوه و کوێستان محه‌مه‌د ئه‌ندامی جڤاتی گشتیی بزووتنه‌وه‌ی گۆڕان به ئێن ئاڕ تی ڕاگه‌یاند: "له‌گه‌ڵ دانانی جێگر و یاریده‌ده‌رێکدا نین بۆ سه‌رۆکی هه‌رێم و ئه‌گه‌ر له په‌رله‌مانیشدا کرا داوا ده‌که‌م هیچ په‌رله‌مانتارێک ده‌نگی پێنه‌دا چوونکه ئه‌مه زیادکردنی پۆسته له‌به‌ر شه‌خس و حزب و بارگرانییه بۆ سه‌ر هه‌رێم."
هه‌فته‌ی ڕابردوو دوای 13 کۆبوونه‌وه له‌سه‌ر پێکهێنانی کابینه‌ی نوێی حکوومه‌تی هه‌رێم، به‌رپرسانی یه‌کێتی و پارتی ڕێککه‌وتنی نێوانیان ڕاگه‌یاند و بڕیاریشه له ڕۆژانی داهاتوودا ڕێککه‌وتنه‌که‌یان واژۆ بکه‌ن.
کۆدی هه‌واڵنێر: 60103
Your Comment