بەپێی هەواڵی کوردپرێس دۆڵی ڕازیانە دیاردەیێکی جیۆلۆجیی تایبەتە کە دەکەوێتە مەودای 50 کیلۆمەتریی جادەی ئیلام بۆ شاری بەدرە لە پارێزگای ئیلام. دیمەنێکی سەرسەوز و دۆڵێکی باریک و قووڵە کە سەرنجی گەشتیاران بۆ خۆی ڕادەکێشێت.

ڕێژەی 75 هێکتار (300 دۆنم) لە زەوییەکانی دۆڵی ڕازیانە ساڵی 1388 وەکوو شوێنەواری سروشتی و نیشتمانیی ئێران تاپۆ کراوە وەکوو شوێنەواری پلە دووی ڕیکخراوی نێودەوڵەتیی IUCN تۆمار کراوە.

جادە مێژووییەکەی شاری بەدرە (ئابهەر) بەرەو کەلی ئەرەشت و بردباڵ چنارباشی لە "کەلەم"ەوە تێدڕەپەڕێت و پاش بڕینی دۆڵی ڕازیانە دەگاتە گوندی "گەنجە" و ناوچەی چنارباشی. ئەوەش دیمەنێکی زۆر جوانە کە بەتایبەت لە وەرزی بەهاردا سەرنجی هەموو گەشتیارێک ڕادەکێشێت.