به‌پێی هه‌واڵی کوردپرێس، یڵماز یۆکسل سه‌رۆکی پارتی دیموکراتی گه‌لان (HDP) له پارێزگای موغله له به‌یاننامه‌یێکدا ئاماژه‌ی به هه‌ڵبژاردنی شاره‌وانییه‌کانی 2019 له تورکیا کرد و گوتی: مێهمه‌ت پۆلات کاندیدی HDP له هه‌ڵبژاردنی شاره‌وانیی موغله له‌گه‌ڵ سه‌رجه‌م کاندیدی شاره‌کانی ئه‌و پارێزگایه وازیان له به‌شداری‌کردن له هه‌ڵبژاردن هێنا ئه‌وه‌ش له به‌رژه‌وه‌ندیی کاندیده‌کانی ئۆپۆزیسیۆندا.
ناوبراو له درێژه‌دا جه‌ختی کرد: هۆکاری پاشگه‌زبوونه‌وه‌ی کاندیده‌کانی ئێمه له گۆڕه‌پانی هه‌ڵبژاردن کاردانه‌وه‌یه به هاوپه‌یمانێتیی پارتی داد و گه‌شه(AKP)- پارتی بزاڤی نه‌ته‌وه‌په‌ره‌ست (MHP) و هێشتا پشتیوانی له کاندیدی پارتی کۆماریخوازی گه‌لی تورکیا (CHP) یه‌کلا نه‌بۆته‌وه و ئه‌نجومه‌نی ناوه‌ندیی حیزب له‌وباره‌وه بڕیار ده‌دات.
شایانی باسه؛ پاش کشانه‌وه‌ی کاندیدی HDP له موغله ئێستاکه عوسمان گورون له CHP، مێهمه‌ت کۆجادون له حیزبی سه‌عاده‌ت و مێهمه‌ت نیل حه‌یده‌ر له AKP کاندیده‌کانی شاره‌وانیی موغله له هه‌ڵبژاردنی 2019 ده‌بن.
سه‌رچاوه: ڕۆژنامه‌ی جمهوورییه‌ت
کۆدی هه‌واڵنێر: 60103
Your Comment