به‌پێی هه‌واڵی کوردپرێس، ڕه‌حمان ڕه‌سووڵ ئه‌ندامێکی ده‌سته‌ی به‌ڕێوه‌به‌رایه‌تیی ته‌ڤگه‌ری ئازادی به KNNی ڕاگه‌یاند: ئاسایشی یه‌كێتی له سلێمانی 100 ئه‌ندام و لایه‌نگری ته‌ڤگه‌ری ئازادی به تۆمه‌تی مانگرتن بۆ ئازادی عه‌بدوڵڵا ئۆجه‌لان ڕێبه‌ری پارتی كرێكارانی كوردستان (په‌كه‌كه) ده‌ستگیر ده‌كات و تا ئێستاش 9 كه‌سیان ئازاد كراون و 91 كه‌سیان چاره‌نووسیان نادیاره.
ناوبراو ئاماژه‌ی به‌وه‌ش کرد که بۆ زانینی چاره‌نووسی ده‌ستگیركراوه‌كانیان سه‌ردانی ئاسایشی سلێمانیان كردوووه به‌ڵام به بیانووی نه‌بوونی ده‌وام به‌ڕێخراون و ڕێگه‌ی دیداریان پێنه‌دراوه.
چه‌ند هه‌فته له‌مه‌وپێش حکوومه‌تی هه‌رێمی کوردستان بڕیارێکی ده‌رکرد بۆ داخستنی ئه‌و حزب و ڕێکخراوانه‌ی که له وه‌زاره‌تی ناوخۆی حکوومه‌تی هه‌رێمی کوردستان مۆڵه‌تی حزبیان وه‌رنه‌گرتوووه و له‌و چوارچێوه‌یه‌شدا هێزه‌کانی ئاسایش ده‌ستیان کرد به داخستنی باره‌گاکانی ته‌ڤگه‌ری ئازادی و چالاکییه‌کانی ئه‌و حزبه‌یان ڕاگرت.
له‌لایێکی دیکه‌وه ته‌ڤگه‌ری ئازادیش جه‌ختی کرده‌وه که مۆڵه‌تی چالاکییه سیاسییه‌کانی له ده‌وڵه‌تی عێراق وه‌رگرتوووه و ئه‌ندامێکی ئه‌و حزبه‌ش له په‌رله‌مانی عێراقدایه.
کۆدی هه‌واڵنێر: 60103
Your Comment