به‌پێی هه‌واڵی کوردپرێس، ڕۆژی یه‌کشه‌ممه 16ی کانوونی یه‌که‌می 2018 وه‌فدێكی کونسوڵخانه‌ی ئه‌مه‌ریكا به سه‌رۆکایه‌تیی ستیڤ فه‌یگن کونسووڵی ئه‌مه‌ریكا سه‌ردانی مه‌كۆی سه‌ره‌كیی بزووتنه‌وه‌ی گۆڕانی کرد له سلێمانی و له‌لایه‌ن عومه‌ر سه‌ید عه‌لی ڕێكخه‌ری گشتی و ژووری په‌یوه‌ندیی دیپلۆماسی پێشوازییان لێكرا.
شوناس شێركۆ ئه‌ندامی ژووری په‌یوه‌ندیی دیپلۆماسی گۆڕان ڕای‌گه‌یاند که له کۆبوونه‌وه‌که‌دا هه‌ردوولا گفتوگۆیان له‌باره‌ی دۆخی سیاسیی هه‌رێم و پێكهێنانی كابینه‌ی نۆیه‌می حكوومه‌تی هه‌رێمه‌وه كرد.
له‌و چوارچێوه‌یه‌دا ڕێكخه‌ری گشتی باسی له‌وه كردوووه كه هێشتا گۆڕان بڕیاری له‌باره‌ی به‌شداری كردنی له كابینه‌ی نوێی حكوومه‌تی هه‌رێم نه‌داوه و جڤاتی نیشتمانی ئه‌و بڕیاره یه‌كلایی ده‌كاته‌وه به‌ڵام گفتوگۆكانی له‌گه‌ڵ لایه‌نه‌كان به‌رده‌وامه به‌تایبه‌ت پارتی دیموكراتی كوردستان.
ڕێكخه‌ری گشتی جه‌ختی له‌وه‌ش كردوووه‌ته‌وه که له ئه‌گه‌ری به‌شداری کردن له حکوومه‌ت ئه‌وله‌وییاتی گۆڕان له كابینه‌ی نوێی هه‌رێم لابردنی پاشه‌كه‌وتی مووچه و دابین كردنی خزمه‌تگوزاری سه‌ره‌تایی بۆ هاووڵاتییان و یه‌كگرتنه‌وه‌ی هێزی پێشمه‌رگه‌یه.
لای خۆیشییه‌وه کونسووڵی ئه‌مریكا پێداگری له‌سه‌ر پێكهێنانی حكوومه‌تێكی خزمه‌تگوزار و ئه‌نجامدانی چاكسازی ڕیشه‌یی له هه‌رێم كرده‌وه.
سه‌رچاوه: میدیاکانی عێراق
کۆدی هه‌واڵنێر: 60103
Your Comment