کوردپرێس:

بەپێی ڕاگەیەنراوێك، كە نووسینگەی سەرۆك وەزیرانی عێراق بڵاوی كردۆتەوە، عادل عەبدولمەهدی، سەرۆك وەزیران بەبۆنەی ساڵیادی تێكشكاندنی داعش پیرۆزبایی لە گەلانی عێراق دەكات و بەو بۆنەیەوە داوا دەكات هاووڵاتییان ئاهەنگ بگێڕن و لە كاتژمێر 9ی بەیانی ئەو ڕۆژە پەیامێكی ڕاستەوخۆ لە تەلەفزیۆنەوە پێشكەشی هاووڵاتییان و هێزە ئەمنییەكان دەكات.

بەپێی ڕاگەیەنراوەكەی نووسینگەی سەرۆکایەتیی وەزیرانی عێراق، داوا لە هاووڵاتییان كراوە خولەكێك لە كاتژمێر 1ی نیوەڕۆ بەپێوە بووەستن و جووڵەی ئۆتۆمبێل ڕابگیرێت لە سەرتاسەری وڵات بۆ خوێندنی سوورەتی فاتیحە و بانگ دان و نزاكردن بۆ گیانی شەهیدەكانی شەڕی دژی تیرۆر و نزای چاك­بوونەوە بۆ بریندارەكان بكرێت.

جەختیش كراوەتەوە، كە ئێوارەی ڕۆژی دوو شەممە هاووڵاتییان بۆ خۆشی دەربڕین بەو بۆنەیەوە یاریی ئاگرین بتەقێنن و ئاهەنگ بگێڕن.

هەر ڕاگەیێندراوەکەی نووسینگەی سەرۆکوەزیرانی عێراق ڕاشیگەیاندووە، كە سەرجەم هاووڵاتییان ئاڵای عێراق بەرز بكەنەوە لە سەر دام و دەزگاكان و ماڵەكان و شەقامەكان و ئۆتۆمبێلەكانیان بۆ پیرۆزبایی كردن لەو سەركەوتنە و داواشی لە كەناڵەكانی ڕاگەیاندن كردووە، كە بەو بۆنەیەوە ئاهەنگ بگێڕن.

ڕۆژی دووشەمە 10ی کانوونی یەکەمی 2017 ئەو ڕۆژە بوو کە حەیدەر عەبادی سەرۆکوەزیرانی پێشووی عێراق بە فەرمی ڕایگەیاند کە شەڕی داعش کۆتایی هاتووە و دیاردەی تیرۆریستیی داعش لە عێراق شکستی هێناوە. ڕۆژی دووشەمە یەکەم ساڵیادی ئەو ڕاگەیاندنەیە و سەرۆکایەتیی وەزیرانی نوێی عێراق وێڕای پیرۆزبایی کردن لە گەلی عێراق داواشی کردووە ئاهەنگ و خۆشی بگێڕن. ئەوەش لە کاتێکدایە ئێستاش شەڕی داعش ماوە و جووڵە و هەڵمەتی تیرۆریستی و کوشتن و ڕفاندن بە تایبەتی لە ناوچەی جێناکۆک لە عێراق بەردەوامە و شانە نووستووەکانی داعش ناوبەناو هێرش دەکەن.