بەپێی هەواڵی کوردپرێس، له‌و باره‌یه‌وه، له راگه‌یه‌ندراوێکدا، ره‌وتی سه‌در ریگه‌یاند، ئه‌مڕۆ شاندی دانووستانکاری ره‌وته‌که‌یان له هه‌ولێر له‌گه‌ڵ ژماره‌یه‌ک له به‌رپرسانی باڵای پارتی دیموکراتی کوردستان کۆ بوونه‌ته‌وه.
له راگه‌یه‌ندراوه‌که‌دا ئه‌وه‌ش خراوه‌ته‌ڕوو، که ژماره‌یه‌ک پرسی جێی بایه‌خی هه‌ردوولا تاوتوێ کراون. جه‌خت کراوه‌ته‌وه له‌سه‌ر ده‌ستپێکردنی قۆناغێکی نوێ له کاری به‌رده‌وام بۆ خزمه‌ت کردنی رۆڵه‌کانی عێراق.
ئه‌وه‌ش خراوه‌ته‌ڕوو، جه‌خت له گرنگیی تێگه‌یشتنی دوولایه‌نه بۆ پێکهێنانی کابینه‌ی نوێی حکوومه‌تی عێراق کراوه، که سه‌در داوای کردووه کابینه‌که‌ی له زۆرینه‌ی نیشتمانی پێکبێت و سه‌ر به خۆرئاوا و خۆرهه‌ڵات نه‌بێت.
له راگه‌یه‌ندراوه‌که‌ی ره‌وتی سه‌دردا ئاماژه بۆ ئه‌وه‌ش کراوه، له به‌رامبه‌ردا، هۆشیار زێباری، سه‌رۆکی شاندی پارتی جه‌ختی له‌سه‌ر فراوان کردنی ئاسۆکانی هاوکاری و هه‌ماهه‌نگی دوولایه‌نه کردووه‌ته‌وه له پێناو وه‌ڵامدانه‌وه‌ی خواسته‌کانی جه‌ماوه‌ر و پێکهێنانی کابینه‌ی نوێی عێراق.
سەرچاوە: کوردستان 24
Your Comment