بەپێی هەواڵی کوردپرێس، موقته‌دا سه‌در له‌ تویتێكدا له‌ هه‌ژماری تایبه‌تی خۆی نووسیویه‌تی: "سوپاسی هه‌موو ئه‌وانه‌ ده‌كه‌م كه‌ به‌شداربوون له ‌ئاهه‌نگی دیموكراسی نیشتمانیدا، به‌تایبه‌ت دادگای باڵا و به‌ تایبه‌تر فایه‌ق زێدان و دادگای فیدڕاڵی و كۆمسیۆنی باڵای هه‌ڵبژاردنه‌كان، جینین بلاسخارت نێرده‌ی تایبه‌تی نه‌ته‌وه‌ یه‌كگرتووه‌كان و هه‌موو ئه‌و هاوبه‌شانه‌ی به‌شداریان كرد".

موقته‌دا سه‌در هه‌ر له‌په‌یامه‌كه‌یدا رایگه‌یاندوه‌،: "سوپاس بۆ گه‌لی عێراق كه‌ دانیان به‌خۆیاندا گرت، هه‌روه‌ها سوپاسی مه‌رجه‌عی باڵا ده‌كه‌م كه‌ سه‌رپه‌رشتیكار و رێنماییكاری كه‌رنه‌ڤاڵی هه‌ڵبژاردن بووه‌".

رێبه‌ری ره‌وتی سه‌در باسی له‌وه‌ش كردووه‌، "داوا ده‌كه‌ین، بۆ پاراستنی ئاسایش و هێمنیی نیشتمان كه‌ ئه‌مانه‌تێكه‌ له‌ گه‌ردنیانماندایه‌، به‌خێرایی حكوومه‌تی زۆرینه‌ی نیشتمانی پێكبهێنرێت كه‌ نه‌ رۆژهه‌ڵاتی و نه‌ رۆژئاوایی بێت، رووناكیه‌كه‌ی خاكی نیشتمان رۆشن بكاته‌وه‌ بۆ گه‌لی عێراق له‌دابین كردنی خزمه‌تگوزاری و ئاسایش".

شایانی باسە دادگای باڵای فیدڕاڵی عێراق ئه‌مڕۆ دووشه‌ممه‌ سکاڵا تۆمارکراوەکانی لە ئەنجامی هەڵبژاردنی پێشوه‌ختی پەرلەمانی 10ی تشرینی یەکەمی 2021ی هه‌ڵوه‌شانده‌وه‌ و ئه‌نجامی هه‌ڵبژاردنه‌كانی په‌سه‌ند كرد.