بەپێی هەواڵی کوردپرێس، نووسینگه‌ی ڕاگه‌یاندنی هاوسه‌رۆکی یه‌کێتی بڵاویکردەوە، بافڵ جه‌لال تاڵه‌بانی له ده‌باشان پێشوازیی کرد له دکتۆر مه‌ھدی سه‌فه‌ری، یاریدەدەری وه‌زیری ده‌ره‌وه‌ی کۆماری ئیسلامی ئێران بۆ کاروباری دبلۆماسی و بازرگانی و مه‌ھدی شوشته‌ری، سه‌رکونسوڵی کۆماری ئیسلامی ئێران له شاری سلێمانی.
وەک لە ڕاگەیەندراوەکەدا هاتووە، له دیدارێکدا ته‌ئکید له فراوان کردنی ھاریکاری ئابووری و بازرگانی له نێوان ھه‌ردوولا کرایه‌وه به‌جۆرێک خزمه‌ت به به‌رژه‌وه‌ندی گشتی بکات و پێویستی لێکتێگه‌یشتن و چاره‌سه‌رکردنی کێشه و ئاسته‌نگه‌کانی به‌رده‌م ئاڵوگۆڕی بازرگانی و کارئاسانی زیاتر بۆ بازرگانان و سه‌رمایه‌داران دووپات کرایه‌وه.
هەروەها، گفتوگۆکرا له‌سه‌ر رێوشوێنه‌کانی په‌ره‌پێدانی کاری وه‌به‌رھێنان و جێبه‌جێ کردنی پڕۆژه‌ی ستراتیژی له ھه‌رێم و کارئاسانی زیاتر بۆ خاوه‌نکار و سه‌رمایه‌دارانی کۆماری ئیسلامی ئێران تا له ھه‌رێم سه‌رمایه‌گوزاری زیاتر بکه‌ن و به‌شداری کاریگه‌رتربن له پێشخستنی ئابوری ھه‌رێم، ھه‌ردولا ھاوڕابون له‌سه‌ر ھه‌ماھه‌نگی و به‌رده‌وامی په‌یوه‌ندییه‌کان.
بەپێی راگه‌یه‌ندراوه‌که، هاوسەرۆکی یەکێتی جەختی کردووەتەوە، کە کارئاسانی ته‌واو ده‌که‌ن بۆ ھه‌موو جموجۆڵێکی بازرگانی، ئه‌و په‌یوه‌ندییه ئابوورییه‌ی ھه‌بووه ده‌مانه‌وێت نه‌ک به‌رده‌وامی به‌ڵکوو زیاتری بکه‌ین و ھاوکارمان بن بۆ جێبه‌جێ کردنی چه‌ندین پرۆژه‌ی ستراتیژی و گرنگ که خزمه‌تی زیاتر به ھه‌رێم بکات.
جگەلەوەش، بافڵ تاڵەبانی پاڵپشتی یه‌کێتی ده‌ربڕیوە بۆ ته‌واوکردنی رێوشوێنه یاساییه‌کانی به ره‌سمی ناساندنی مه‌رزه‌کانی کێلی، شوشمێ و پشته.
Your Comment