به‌پێی هه‌واڵی کوردپرێس، ڕه‌وه‌ند مه‌لا مه‌حموود جێگرى لێپرسراوی مه‌ڵبه‌ندى كه‌ركووكى یه‌كێتى بۆ رادیۆى نه‌وا وتى: "دانووستان و گفتوگۆى پێویست كراوه‌ بۆ چاره‌سه‌رى دۆخى كه‌ركووک و كاراكردنه‌وه‌ى ئه‌نجومه‌نى پارێزگا و هاوكات لێكنزیكبوونه‌وه ‌و ڕێككه‌وتن له‌ نێوان پێكهاته‌كاندا هاتۆته‌ ئاراوه‌ به‌ڵام له‌ ئێستادا به‌هۆى پرسى پێكهێنانى حكوومه‌تى نوێى عیراق ئه‌م بابه‌ته‌ بۆ ماوه‌یێک دواكه‌وتوووه‌".

ناوبراو وتیشى: "له‌ چه‌ند هه‌فته‌ى داهاتوودا پارێزگارێكى نوێ بۆ ئه‌و شاره‌ داده‌نرێت و پۆسته‌كانى دیكه‌ش به‌پێى به‌ركه‌وته‌ى هه‌ڵبژاردن یه‌كلایی ده‌كرێنه‌وه‌ و سه‌رۆكایه‌تیی كۆماریش ڕۆڵى ئه‌رێنى ده‌بینێت له‌م ڕوووه‌وه‌".

ڕه‌وه‌ند مه‌لا مه‌حموود باسى له‌وه‌ش كرد "جێى داخه‌ لایه‌نێكى كوردى به ‌هه‌موو هێزێكى و به‌ ڕوون و ئاشكرا خه‌ریكى وێران كردنى نێو ماڵى كورده‌ و ده‌ست ده‌خاته‌ نێو ده‌ستى توركیا بۆ ئه‌وه‌ى كێشه‌كانى كه‌ركووک زیاد و قووڵتر بكات و ئه‌مه‌ش ماڵوێرانى كوردى لێده‌كه‌وێته‌وه."

کۆدی هه‌واڵنێر: 60103