بەپێی هەواڵی کوردپرێس، ئەمڕۆ دووشەممە 15-10-2018، لە شاری سلێمانی و لە بارەگای مەکتەبی سیاسیی یەکێتی، شاندی هاوپەیمانی ئیسڵاح بە سەرۆکایەتیی عەممار حەکیم و یەکێتیی نیشتمانیی کوردستان بە سەرۆکایەتی کۆسرەت رەسول کۆبوونەوە.

بەپێی راگەیێندراوێکی یەکێتی، لە کۆبوونەوەکەدا هەردوولا گفتگۆی ورد و بەرپرسیارانەیان لەبارەی دۆخی عێراق و پرسی پێکهێنانی حکوومەتی نوێی عێراق و بەشداری سەرجەم پێکهاتەکان و چارەسەری کێشەکان بەپێی دەستووری هەمیشەیی عێراق کرد و کۆک بوون لەسەر ئامادە کردنی کارنامەی هەمەلایەنەی حکوومەتی نوێ بۆ چارەسەر کردنی بنەڕەتیی کێشەکان و دەست پێکردنی قۆناخێکی نوێی حوکمڕانی و پرۆسەی سیاسی کە تێیدا عێراق بە سەرجەم پێکهاتەکانییەوە بەهێز دەبێت.

وەک لە راگەیێندراوەکەی یەکێتی دا هاتووە: "کێشە کەڵەکەبووەکانی نێوان هەرێمی کوردستان و ناوەند گفتوگۆیان لەبارەوە کرا، بەتایبەتی پرسی کەرکووک و ناوچە جێناکۆکەکان و جێبەجێ کردنی ماددەی 140ـی دەستوور و چارەسەکردنی کێشەی نەوت، گاز، بودجە و پێشمەرگە بەپێی دەستووری هەمیشەیی عێراق.

سەبارەت بە پرسی سەرۆک کۆماری عێراق و پێکهێنانی کابینەی نوێی حکوومەتی عێراق هاتووە: "هەردوولا جەختیان کردەوە لە پشتیوانی کردنی سەرۆک کۆماری نوێی عێراق و سەرۆکی راسپێردراو بۆ پێکهێنانی کابینەی نوێ و سەرۆکی ئەنجوومەنی نوێنەران بۆ تێپەڕاندنی قەیران و کێشەکان و دەست پێکردنی قۆناخێکی نوێ لە عێراق".

کۆدی هەواڵنێر: 60113