کوردپرێس:
فوئاد حوسێن، بەربژێری پارتی بۆ پۆستی سەرۆککۆماری عێراق روونکردنەوە و سوپاسنامەیەک بڵاودەکاتەوە و تێیدا باسی رێککەوتنی نێچیرڤان بارزانی و بافڵ تاڵەبانی دوو کاژێر پێش کۆبوونەوەکە دەکات و هۆکارەکانی کشانەوەی لە کێبڕکێکە رووندەکاتەوە. هەروەها سوپاسی سەرۆک بارزانی دەکات بۆ ئەوەی بەربژێری کردووە و سوپاسی نێچیرڤان بارزانی و شاندی یاوەری دەکات کە لەو ماوەیەدا بۆ پشتگیریکردنی سەردانی بەغدایان کردووە.
ده‌قی ڕوونكردنه‌وه و سوپاسنامه‌یه‌ك له فواد حوسێنه‌وه:
دوابه‌دوای به‌ربژێركردنمان له‌لایه‌ن به‌ڕێز سه‌رۆك مسعود بارزانی و به پشتگیری پارتی دیموكراتی كوردستان، به‌شداریمان كرد له چاڵاكییه‌كان و كاركردن بۆ دانانی زه‌مینه‌یه‌كی دروست بۆ هه‌ڵبژاردنی سه‌رۆك كۆماری عێراق، له‌سه‌ر بنه‌مای ئه‌وه‌ی تێگه‌یشتنمان بۆ پرۆسه‌كه به‌و شێوه‌یه بوو كه كێبركێه‌كه له چوارچێوه‌ی ئیراده‌ی نوێنه‌رانی هه‌رێم له به‌غدا، یان له‌سه‌ر بنه‌مای رێككه‌وتنی هه‌ردولایه‌نی سه‌ره‌كی پرۆسه‌كه ئه‌نجام ده‌درێت. و زۆر دلخۆش بووین كاتێك كه برای به‌ڕێز نێچیرڤان بارزانی و به‌ڕێز بافل تاڵه‌بانی گه‌یشتنه رێككه‌وتن له نێوانیاندا كه یه‌ك به‌ربژێر پێشكه‌شی ئه‌نجومه‌نی نوێنه‌رانی عێراق بكه‌ن. ئه‌م رێككه‌وتنه نزیكه‌ی دوو كاتژمێر پێش كۆبوونه‌وه‌ی په‌رله‌مانی عێراق بوو.
به‌ڵام ئێمه تووشی سه‌رسوڕمان بووین كاتێك كۆبوونه‌وه‌ی په‌رله‌مان ده‌ستی پێكرد، بینیمان لایه‌نه‌كه‌ی تر به‌ربژێری خۆی نه‌كشاندۆته‌وه، و چوونه‌ته ناو هاوپه‌یمانی جیاجیا له‌گه‌ڵ هێزه عێراقییه‌كان، و ئه‌و میكانیزمه‌یان پشتگوێ خست كه له‌سه‌ری رێككه‌وتبوون و پابه‌ند نه‌بوون به به‌ڵێنه‌كه‌یان.
به‌و پێیه‌ی بڕوامان به‌وه بوو كه یهكلاییكردنهوهی به‌ربژێر مافی پێكهاته‌ی كورده، بۆیه بڕیارماندا به پرۆسه‌كه بكشێینه‌وه. دوابه‌دوای ئه‌م روونكردنه‌وه‌یه، كه به پێویستمانزانی بڵاوی بكه‌ینه‌وه بۆ ئاگاداربوونی هه‌موو لایه‌ك له راستییه‌كان ، له‌م ده‌رفه‌ته‌دا پێزانینمان ئاراسته‌ی سه‌رۆك مسعود بارزانی ده‌كه‌ین و سوپاسی به‌ڕێزیان ده‌كه‌ین بۆ به‌ربژێركردنمان بۆ ئه‌و پۆسته. سوپاس و پێزانینمان ئاراسته‌ی برای به‌ڕێز كاك نێچیرڤان بارزانی و شاندی هاورێی ده‌كه‌ین كه بۆ پشتگیری كردنمان سه‌ردانی به‌غدایان كرد و به‌شدارییان له دانوساندن و گفتوگۆكاندا كرد.
هه‌روه‌ها سوپاسی ئه‌ندامانی مه‌كته‌بی سیاسی پارتی و گشت ئه‌ندام و لایه‌نگرانی ئه‌م حیزبه ده‌كه‌ین. سوپاسی ئه‌و گروپه چاڵاكه ده‌كه‌ین كه هاورییه‌تی ئێمه‌یان كرد بۆ سه‌ردانی به‌غدا و ژماره‌یه‌كی زۆر چاڵاكی راگه‌یاندنی چڕوپڕیان ئه‌نجامدا. ئه‌و به‌ڕێزانه باشترین پاڵپشت بوون بۆمان.
هه‌ر به‌م بۆنه‌یه‌وه سوپاسی ملیۆنه‌ها له رۆله‌كانی گه‌لی كوردستان ده‌كه‌م كه به‌دواداچوونیان بۆ ئه‌م رووداوه كردووه. هه‌روه‌ها سوپاس و پێزانینمان ئاراسته‌ی سه‌دان و هه‌زاران كه‌س له پێكهاته جیاوازه‌كانی ناو عێراق ده‌كه‌ین كه له‌گه‌ڵماندا هاوسۆز بوون ، و سوپاسی هه‌موو هاوڵاتیانی كورد و عێراقییه‌كانی هه‌نده‌ران و هاوڵاتیه بیانییه‌كان ده‌كه‌ین كه پشتگیرییان له ئێمه كرد.
سوپاسی راگه‌یاندنكاره‌كانی كوردستانی و عێراقی ده‌كه‌ین كه ده‌رفه‌تیان پێداین بۆ روونكردنه‌وه و پێشكه‌شكردنی به‌رنامه‌كانمان. لێره‌دا دووپاتی ده‌كه‌ینه‌وه كه كاری ئێمه له كاروانی خه‌باتی دور و درێژمان هه‌میشه له پێناو یه‌كریزی لایه‌نه كوردستانییه‌كان و به‌دیهێنانی ئه‌و پره‌نسیپانه بووه كه بڕوای ته‌واومان پێی هه‌بووه. بۆیه و له‌و روانگه‌یه‌وه، پێویسته له‌سه‌ر هه‌موو لایه‌كمان یه‌كڕیزی گه‌لی كوردستان بپارێزین.
له كۆتاییدا پیرۆزبایی له گه‌لی كوردستان ده‌كه‌م به بۆنه‌ی سه‌ركه‌وتنی هه‌ڵبژاردنه‌كان و ئه‌و پرۆسه دیموكراسیه.
هه‌ر له خۆشیدا بن...
فوئاد حسێن
پێنج شه‌ممه
4/10/2018
کۆدی هەواڵنێر: 60101
Your Comment