به‌پێی هه‌واڵی کوردپرێس، سه‌عید خه‌ڵه‌ف فه‌رمانده‌ی فه‌وجی شه‌شه‌می هێزی پۆلیسی عیراقی فیدراڵ له‌ شارۆچكه‌ی حه‌ویجه‌ له‌ راگه‌یه‌نراوێكدا ئاشكرای كرد: به‌ مه‌به‌ستی پاراستنی هێڵه‌كانی كاره‌با له ‌ناوچه‌كانی باشووری که‌رکووک له‌ هێرش و په‌لاماره‌كانی ڕێكخراوی داعش 500 پۆلیس ئه‌ركیان پێدراوه.

ناوبراو ئه‌وه‌شی وه‌بیر هێنایه‌وه‌ كه‌ چه‌كدارانی داعش بۆشایییه‌ ئه‌منییه‌كان ده‌قۆزنه‌وه‌ بۆ ئه‌نجامدانی چالاكی تیرۆریستی و هێزه‌ ئه‌منییه‌كانیش له‌مه‌ودوا ئه‌ركی سه‌رشانیان جێبه‌جێ ده‌كه‌ن.

سه‌عید خه‌ڵه‌ف گوتیشی: له‌پێناو پاراستنی سه‌قامگیریی ناوچه‌كه‌دا پێویستیان به‌ پشتگیریی هاووڵاتیانیش هه‌یه‌.

دوای ئه‌وه‌ی ساڵی ڕابردوو شارۆچكه‌ی حه‌ویجه‌ له‌ باشووری خۆرئاوای که‌رکووک له‌ داعش پاككرایه‌وه‌ سێ وێستگه‌ی كاره‌بای ناوچه‌كه‌ جار جاره‌ ڕووبه‌ڕووی هێرش و په‌لامار ده‌بنه‌وه‌. هه‌روه‌ک به‌هۆی هێرشه‌كانی داعشه‌وه‌ هێڵه‌كانی ته‌زووی كاره‌بای که‌رکووک تووشی پچڕان ده‌بن و هه‌ندێک جار شاره‌كه‌ بۆ ماوه‌ی 18 كاتژمێر بێ‌كاره‌با ده‌بێت.

سه‌رچاوه‌: ڕادیۆ نه‌وا

کۆدی هه‌واڵنێر: 60103