به‌پێی هه‌واڵی کوردپرێس، ئه‌نتۆنیۆ گوتیرێس له لێدوانێکدا بۆ ڕۆژنامه‌وانان له ناوه‌ندی گشتیی نه‌ته‌وه یه‌کگرتوووه‌کان ئاماژه‌ی به‌وه کرد که ئیدلب دوایین ناوچه‌ی دوور له پێکدادانه و به پێویستی زانی نه‌کرێته گۆمی خوێن.
جه‌ختی له‌وه‌ش کرده‌وه دۆخی ئێستای ئیدلب هی ئه‌وه نییه درێژه‌ی پێبدرێت و ناکرێت ڕێگه به بوونی تیرۆریستانیش بدرێت به‌ڵام له به‌ره‌نگاربوونه‌وه‌ی تیرۆردا پێویسته به‌رپرسارێتی و ئه‌رکه نێوده‌وڵه‌تییه‌کان له‌بیر نه‌کرێن.
ئه‌نتۆنیۆ گوتیرێس به شێوه‌ی ڕاسته‌وخۆ و ناڕاسته‌وخۆ بانگه‌وازی کراوه‌ی ئاراسته‌ی سه‌رجه‌م لایه‌نه‌کان کردوووه و به‌تایبه‌تیش بانگه‌وازی ئاراسته‌ی هه‌ریه‌ک له تورکیا، رووسیا و ئێران کرد هیچ هه‌وڵێک به فیڕۆ نه‌ده‌ن که له پێناو ڕێگری کردن له جه‌نگ له ئیدلب و پارێزگاری کردن له هاووڵاتییانی مه‌ده‌نی ده‌درێت.
ناوبراو باسی له‌وه‌ش کرد له هه‌موو ده‌رفه‌تێکدا په‌یامی دۆزینه‌وه‌ی چاره‌سه‌ری سیاسی بۆ قه‌یرانی سووریا داوه و ڕای‌گه‌یاند: "پارێزگاریی کردن له‌و مرۆڤانه‌ی که ئازاری ئێجگار زۆریان بینیوه به‌رپرسیارێتیی هاوبه‌شمانه".
سه‌رچاوه: هه‌واڵده‌ریی ئه‌نادۆڵو
کۆدی هه‌واڵنێر: 60103
Your Comment