به‌پێی هه‌واڵی کوردپرێس، ئیره‌ج مه‌سجدی باڵیۆزی ئێران له عێراق له میانی كۆنگره‌یێكی ڕۆژنامه‌وانیدا كه له باڵه‌خانه‌ی كونسووڵخانه‌ی وڵاته‌كه‌ی له شاری به‌سره له دوای نۆژه‌نكردنه‌وه‌ی سازی كرد ڕای‌گه‌یاند: "سووتاندنی كونسووڵخانه پێچه‌وانه‌ی بنه‌ما ئه‌خلاقیی و نێوده‌وڵه‌تییه‌كانه به‌ڵام په‌یوه‌ندییه‌كان به برایانه ده‌مێنێته‌وه و سووتاندنی كونسوڵخانه‌كه‌مان كاریگه‌ری له‌سه‌ر په‌یوه‌ندییه‌كانی نێوان هه‌ردوولا (عێراق و ئێران) نابێت".
باڵیۆزی ئێران له عێراق له‌باره‌ی ئه‌و زیانانه‌ی به‌ر كونسووڵخانه‌ی وڵاته‌كه‌ی له شاری به‌سره كه‌وتوووه وتی: "ته‌نها زیانی مادی به‌ر كونسووڵخانه‌ی ئێران كه‌وتوووه، به‌ر له‌وه‌ی خۆپیشانده‌ران ئاگری تێبه‌ربده‌ن توانیمان كارمه‌نده‌كانی ده‌ربهێنین" و ئاماژه‌ی به‌وه‌شكرد كه وڵاته‌كه‌ی هه‌میشه له پاڵ عێراق و به‌تایبه‌ت له‌گه‌ڵ به‌سره ده‌بێت.
ئیره‌ج مه‌سجدی وتیشی: "ساڵانه نزیكه‌ی شه‌ش ملیۆن كه‌س له ئێرانه‌وه دێنه عێراق و ئێران هامه‌هه‌نگیی سه‌ربازی و ئابووری و رۆشنبیری له‌گه‌ڵ عێراقدا هه‌یه".
شایانی باسه؛ ڕۆژی هه‌ینی ڕابردوو له میانی خۆپیشاندانی ناڕه‌زاییی دانیشتوانی شاری به‌سره خۆپیشانده‌ران چوونه سه‌ر كونسووڵخانه‌ی ئێران له‌و شاره و ئاگریان له باڵه‌خانه‌كه‌ی به‌ر دا كه به‌هۆیه‌وه زیانێكی زۆری ماددی پێگه‌یشت و بوووه هۆی داخستنی كۆنسووڵخانه‌كه.
سه‌رچاوه: ڕادیۆ نه‌وا
کۆدی هه‌واڵنێر: 60103
Your Comment