کوردپرێس:

خالد عەتیە سەرۆکى دەستەى حەج و عەمرەى عێراق لە کۆنگرەیێکى ڕۆژنامەوانیدا ڕایگەیاند، وەرزى حەجى ئەمساڵ سەرکەوتوو بووە وهیچ ڕووداوێکى تێدا تۆمار نەکراوە، ڕونیشیکردەوە"سبەى شەممە حاجیان لە ڕێگاى وشکانیەوە دەست بەگەڕانەوە دەکەن و ڕۆژى دووشەممەش لە ڕێگاى ئاسمانیەوە".

عەتیە ئەوەشى خستە ڕوو، گەڕانەوەى حاجیانى عێراق ١٥ رۆژ دەخایەنێت، وتیشى" ١٠ حاجى عێراقى کە پێنجیان ژن بوون لە سعوودیە و لە وەرزى حەجى ئەمساڵدا کۆچى دواییان کردووە".

سەرۆکى دەستەى حەج و عەمرەى عێراق ئاماژەى بەوەش کرد، هەوڵ دەدەن بۆ زیاد کردنى ژمارەى حاجییانى عێراق بۆ وەرزى داهاتووى حەج ڕێککەوتن لەگەڵ سعوودیە بکەن.

ئەمساڵ لە ١٥ پارێزگاى عێراق جگە لە هەرێمى کوردستان نزیکەى ٣٨ هەزار حاجى عێراقى سەردانى وڵاتى سعودیەیان کرد بە مەبەستى بە جێهێنانى فەریزەى حەج.