بەپێی هەواڵی کوردپرێس، له دووه‌مين ڕۆژى سه‌ردانه فه‌رمييه‌که‌يدا بۆ شانشينى يه‌کگرتوو، نێچیرڤان بارزانی سەرۆکی هەرێمی کورستان لەگەڵ سەرۆکی ئەنجومەنی لۆردان کۆبووەوە و له کۆبوونه‌وه‌که‌دا ده‌رباره‌ى دوايين پێشهاته‌کانى دۆخى عێراق و ناوچه‌که، پرۆسه و ژيانى سياسى له عێراق و هه‌رێمى کوردستان و هه‌ڵبژاردنه‌کانى داهاتوو بيروڕايان ئاڵوگۆڕ کرد.
لۆرد ماکفۆل ستايشى پرۆسه‌ى ديموکراسى له هه‌رێمى کوردستان و دانانى کۆتا بۆ مسۆگه‌ر‌کردنى به‌شداريى ئافره‌تان و نوێنه‌رى پێکهاته‌کان له پرۆسه‌ى سياسى و ژيانى په‌رله‌مانى و دامه‌زراوه‌کانى حکووميدا کرد و دووپاتى کرده‌وه که په‌رله‌مانى به‌ريتانيا له پشتگيريى هه‌رێمى کوردستان به‌رده‌وام ده‌بێت، بۆ ئه‌م مه‌به‌سته‌ش پێشنيار و ڕاسپارده ده‌داته حکوومه‌تى وڵاته‌که‌ى، هه‌روه‌ها سوپاسى ڕۆڵى هه‌رێمى کوردستانى له به‌ره‌نگاربوونه‌وه‌ى تيرۆر و تێکشکاندنى داعشدا کرد.
لاى خۆيه‌وه نێچيرڤان بارزانى سوپاس و پێزانينى هه‌رێمى کوردستانى بۆ به‌رده‌واميى پشتگيريى په‌رله‌مان و ئه‌نجومه‌نى لۆردان و حکوومه‌تى به‌ريتانيا له عێراق و هه‌رێمى کوردستان دووپات کرده‌وه، هه‌روه‌ها سوپاسى په‌رله‌مانى به‌ريتانياى کرد که تاوانه‌کانى داعشى به‌رامبه‌ر به ئێزدييان و پێکهاته‌کانى ديکه له عێراق و هه‌رێمى کوردستان به جينۆسايد ناساندووه و داواى کرد په‌رله‌مانى به‌ريتانيا له پته‌و کردنى ديموکراسى و دامه‌زاروه‌کانى وڵاتدا، هاوکاريى هه‌رێمى کوردستان بکات.
Your Comment