به‌پێی هه‌واڵی کوردپرێس، ڕۆژی سێشه‌ممه‌ 7ی ئابی 2018 هێرۆ ئیبراهیم ئه‌حمه‌د ئه‌ندامی مه‌كته‌بی سیاسیی یه‌كێتیی نیشتمانیی كوردستان به ‌یاوه‌ریی شاناز ئیبراهیم ئه‌حمه‌د سه‌ردانی شاری که‌رکووکی كرد و له‌لایه‌ن ئاسۆ مامه‌ند لێپرسراوی مه‌ڵبه‌ندی كه‌ركووک و به‌ ئاماده‌بوونی جێگران و لێپرسراوانی به‌شه‌كانی مه‌ڵبه‌ند و كاندیداکانی سه‌ركه‌وتوو بۆ په‌رله‌مانی عێراق و ژماره‌یێک كادیرانی پێشكه‌وتووی یه‌كێتی پێشوازیان لێكرا.

له‌ دیداره‌دا هێرۆ ئیبراهیم ئه‌حمه‌د ڕای‌گه‌یاند: "له‌ دواهه‌ڵبژاردندا كه‌ بۆ په‌رله‌مانی عێراق ئه‌نجام درا كه‌ركووكییه‌كان سه‌لماندیانه‌وه‌ كه‌ركووک كوردستانییه‌ و ده‌ستبه‌رداری خاكی باوباپیرانییان نابن بۆ هیچ هێز و لایه‌نێک."

له ‌دانیشتنێكدا ئاسۆ مامه‌ند به‌ ناوی هه‌ڤاڵانی مه‌ڵبه‌ندی كه‌ركووک به‌ گه‌رمی به‌خێرهاتنی هێرۆ ئیبراهیم ئه‌حمه‌د و وه‌فدی یاوه‌ری كرد و ئه‌م دیدار و سه‌ردانانه‌ی بۆ شاری كه‌ركووک به‌ گرنگ و پێویست بۆ كه‌ركووک و دۆزه‌كه‌ی له‌ قه‌ڵه‌م ‌دا و ڕاشی‌گه‌یاند: كه‌ركووكییه‌كان هه‌میشه‌ درێژه‌پێده‌ری ڕێبازه‌كه‌ی مام جه‌لالن.

ناوبراو وتیشی: هه‌تا كوردێک له‌ که‌رکووک مابێ هه‌ر به‌ كوردستانیی ده‌مێنێته‌وه‌ و ئه‌م دۆخه‌ش تا سه‌ر له‌ كه‌س قبووڵ ناكه‌ین و هه‌ڵوێستمان ده‌بێت.

لای خۆیه‌وه‌ هێرۆ ئیبراهیم ئه‌حمه‌د وێڕای سوپاسگوزاری بۆ ئه‌و پێشوازییه‌ گه‌رمه‌ی كه‌ لێی كرا هاوكات رایگه‌یاند: به‌ درێژاییی مێژوو كه‌ركووكییه‌كان سه‌رمه‌شقی گیانفیدایی بوون و له‌و پێناوه‌شدا قوربانی زۆریان داوه‌.

ناوبراو وتیشی: له‌ دوا هه‌ڵبژاردندا كه‌ بۆ په‌رله‌مانی عێراق ئه‌نجام درا كه‌ركووكییه‌كان سه‌لماندیانه‌وه‌ كه‌ركووک كوردستانییه ‌و ده‌ستبه‌رداری خاكی باوباپیرانییان نابن بۆ هیچ هێز و لایه‌نێک.

له‌ ته‌وه‌رێكی دیكه‌ی دانیشتنه‌كه‌دا ئاسۆ مامه‌ند لێپرسراوی مه‌ڵبه‌ندی كه‌ركووک هه‌وڵ و كۆششه‌كانی نوێنه‌رانی یه‌كێتی له‌ به‌غدای به‌رز نرخاند و وتی: ڕۆڵی گرنگ و به‌رچاویان گێڕاوه‌ بۆ وه‌ستاندن و كه‌م كردنه‌وه‌ی ئه‌و ناحه‌قییه‌ی كه‌ ده‌رحه‌ق به‌ كوردانی که‌رکووک ده‌كرێ و له‌و چوارچێوه‌یه‌شدا ڕۆڵی د. فوئاد مه‌عسووم سه‌رۆک كۆماری عێراق و په‌رله‌مانتارانی پێشووی به‌رز نرخاند.

سه‌رچاوه‌: PUK media

کۆدی هه‌واڵنێر: 60103