بەپێی هەواڵی کوردپرێس، تەلەفزیۆنی ڕووداو بڵاوی کردەوە محەممەد شیاع سوودانی، سەرۆکوەزیرانی عێراق بە سەردانێک گەیشتە هەولێر و لەلایەن مەسروور بارزانی، سەرۆکوەزیرانی هەرێمی کوردستانەوە لە فڕۆکەخانەی نێودەوڵەتیی هەولێر پێشوازیی لێکرا.

باسم عەوادی، گوتەبێژی حکوومەتی عێراق لەبارەی سەردانەکەوە بە ڕووداوی وت: "سەردانەکە لە چوارچێوەی بنەمای پەیوەندی و گفتوگۆ لەبارەی بابەتە گرنگەکان لەنێوان بەغدا و هەرێمی کوردستان دەبێت، کە حکوومەت لەگەڵ هەموو لایەنەکانی پرۆسەی سیاسی جەختی لەسەر دەکاتەوە."

عەوادی ئاماژەی بەوەش کرد: "سەرۆکوەزیرانی عێراق گفتوگۆ و راوێژ دەکات، کە ئەویش پێداچوونەوە بە دۆسیە هاوبەشەکان لەژێر رۆشنایی گۆڕانکارییە نێوخۆییەکان و رووداوە خێراکانی دەرەوە لەخۆدەگرێت."

بەپێی زانیارییەکان، بڕیارە محەممەد شیاع سوودانی هەر ئەمڕۆ لەگەڵ مەسعوود بارزانی کۆ ببێتەوە.