بەپێی هەواڵی کوردپرێس، ڕێبەری باڵای کۆماری ئیسلامیی ئێران لە تاران پێشنوێژی جەژنی رەمەزانی کرد، دواتر گوتارێکی پێشکێش کرد و تێیدا ئاماژە بە دۆخی ناوچەکە، هێرشەکانی ئیسرائیل بۆ سەر غەززە و لوبنان، سیاسەتی ئەمریکا و وڵاتانی ڕۆژئاوا بەرامبەر کۆماری ئیسلامیی ئێران و هەڕەشەکانی ئەمدواییەی بەرپرسانی ئەمریکا لە دژی ئێران کرد.

 ئایەتۆڵڵا خامنەیی ئاماژەی بە هێرشە بەردەوامەکانی ئیسرائیل لە ڕۆژهەڵاتی نێوەڕاست کرد و رایگەیاند: "لەم ناوچەیەدا تەنیا یەک هێزی بەوەکالەت هەیە، ئەویش ڕژێمی گەندەڵ و قۆرخکاری زایۆنییە. ڕژێمی زایۆنی بە نوێنەرایەتی کۆڵۆنیالیستەکانەوە هێرش دەکاتە سەر وڵاتان".

ڕێبەری باڵای ئێران گوتیشی: "تیرۆر کردنی کەسایەتییەکان کردەوەیێکی باوی زایۆنییەکانە و لەو ڕووەوە لەلایەن ئەمریکا و وڵاتانی ڕۆژئاواوە پشتیوانی دەکرێت". گوتیشی: "دەبێت ئەم تاقمە تاوانکارییە لە فەلەستین بنبڕ بکرێت و پشتیوان بە خوا بنبڕیش دەکرێت".

 ڕێبەری باڵای کۆماری ئیسلامیی ئێران ئاماژە بە گرژییەکانی نێوان ئێران و ئەمریکا کردەوە و جەختی کردەوە کە هەڵوێستمان نەگۆڕاوە، ئەگەر هێرش بکرێتە سەر ئێران، وەڵامێکی تووندمان دەبێت.

ئایەتۆڵڵا خامنەیی گوتیشی: "هەموو لایێک بزانن، هەڵویستمان هەر هەمان هەڵویستی جارانە. دوژمنایەتی ئەمریکا و رژێمی زایۆنیش، هەر هەمان شتە کە جاران هەبوو. هەڕەشە دەکەن کە شەڕانگیزی دەکەن، هەڵبەت ئەگەر شەڕانگێزییەک رووبدات، ئێمە زۆر دڵنیا نین، پێمانوایە ئەگەری زۆر نییە کە شەڕانگێزی لە دەرەوە رووبدات، بەڵام ئەگەر شەڕانگێزییەک ڕووبدات، بە دڵنیاییەوە لە بەرامبەر گورزەکەی ئەوان، گورزێکی تووندمان دەبێت".

ڕێبەری سەبارەت بە ئەگەری هاندانی دەرەکی بۆ دروستکردنی پشێوی لە وڵاتیش هۆشداری دا و رایگەیاند: "ئەگەر بیر لەوە بکەنەوە کە لە ناوخۆی وڵات فیتنەیێک دەستپێبکەن، وەکوو چەند ساڵێک لەمەوبەر کە فیتنەیان دروست کرد، گەلی ئێران خۆی وەڵامیان دەداتەوە، هەر وەکوو ئەوەی لە ڕابردوو وەڵامیان داوەتەوە".