بەپێی هەواڵی کوردپرێس، بەرەی کوردستانی سووریا لە بەیاننامەیێکدا دەڵێت: گەلی سووریا هیوای دەخواست دوای ڕووخانی ڕژێم، ئەم قۆناغە ببێتە سەرەتای کۆتاییهێنان بە ستەم و بنیاتنانی دەوڵەتێکی دیموکراتی فرە لایەن، بەڵام ئەوەی لەو کاتەدا ڕوویدا لە پێکهێنانی حکوومەتی کاتی و پاشان پرۆسەی بەناو دیالۆگی نیشتمانی، دواجاریش حکوومەتی ڕاگوزەر، دووپاتی کردەوە کە ئیدارەی ئێستا بە بەرگێکی ئیسلامی بەرەو ستەمێکی نوێ دەڕوات، لەبری دامەزراندنی شەراکەتی نیشتمانی ڕاستەقینە.
بەرەی کوردستانی سووریا هەر لە بەیاننامەکەدا دەڵێت: ئەم حکوومەتەی ڕاگەیەنرا، بەرهەمی ڕێککەوتنێکی نیشتمانی نییە و نوێنەرایەتییەکی ڕاستەقینەی ئەو هەمەچەشنییە نەتەوەییە نییە کە لەوڵاتەکەدا هەیە، ئەم حکوومەتەش ناتوانێت هیچ شەرعییەتیەک بەدەست بهێنێت تا نوێنەرانی پێکهاتە جیاوازەکانی سووریا بەکوردیشەوە نەکات، دەشڵێت:  دیاریکردنی وەزیر و بەرپرسانی حکوومەت، نوێنەرایەتی پێکهاتەکان ناکات، چوونکە هیچ تاکێک ناتوانێت نوێنەرایەتی گەلێک بکات بەبێ پرۆسەیەکی دیموکراتی ڕاستەقینە.
بەرەی کوردستانی سووریا جەخت لەوە دەکاتەوە، هەر حکوومەتێکی کاتی ڕاستەقینە، دەبێت بەرهەمی دیالۆگێکی نیشتمانی گشتگیر بێت کە نوێنەرایەتییەکی دادپەروەرانەی هەموو پێکهاتەکان بکات و قۆناغێکی نوێ لەسەر بنەماکانی دیموکراسی و پلۆرالیزم و هاوبەشی کاریگەر دابمەزرێنێت.
بەرەی کوردستانی سووریا دەشڵێت: داهاتووی سووریا لەسەر بنەمای پەراوێزخستن بنیات نانرێت، بەڵکوو لە ڕێگەی دیالۆگێکی نیشتمانییەوە بونیاتدەنرێت کە بنەماکانی دادپەروەری و یەکسانی پتەو دەکات و مافی هەموو خەڵکی سوریا بەبێ جیاوازی دەستەبەر دەکات.
 بۆیە جەختی لەوە کردووەتەوە، سیستەمی فیدراڵی بۆ ئەمڕۆی سووریا باشترین چارەسەرە کە دەتوانێت نوێنەرایەتی هەموو پێکهاتەکان بکات و مافی هەمووان بپارێزێت.
ڕۆژی ۲۹ـی ئاداری ۲۰۲۵، ئەحمەد شەرع سەرۆکی قۆناغی ڕاگوزەری سووریا کابینەی حکوومەتی کاتی سووریای راگەیاند کە لە ۲۳ وەزارەتی پێک دێت، بەپێی زانیارییەکان، پێکهاتەکان لە یەکەم کابینەی حکوومەتی نوێی سووریا، پێکهاتەکان پەراوێزخراون، لەوانەش کورد.
کابینە نوێیەکەی حکوومەتی سووریا پێکهاتوون لە:
۱. محەمەد ترکو، وەزیری پەروەردە
۲. موسعەب نزال، وەزیری تەندروستی
۳. محەمەد بەشیر، وەزیری وزە
۴. مرهف ئەبو قەسرە، وەزیری بەرگری
۵. ئەسعەد شیبانی، وەزیری دەرەوە
۶. ئەنەس خەتاب، وەزیری ناوخۆ
۷. مەزهەر ئەلوەیس، وەزیری داد
۸. نزال شعار، وەزیری ئابووری
۹. محەمەد یەسر ئەلبەنیە، وەزیری دارایی
۱۰. هند قبوات، وەزیری کاروباری کۆمەڵایەتی
۱۱. محەمەد عەنجەرانی، وەزیری کاروباری ناوخۆ و ژینگە
۱۲. ڕائید ساڵح، وەزیری فریاگوزاری
۱۳. عەبدولسەلام هەیکەل، وەزیری گەیاندن
۱۴. ئەمجەد بەدر، وەزیری کشتوکاڵ
۱۵. مستەفا عەبدولڕەزاق، وەزیری ئاوەدانکردنەوە و نیشتەجێکردن
۱۶. مەروان حەلەبی، وەزیری خوێندنی باڵا
۱۷. محەمەد ساڵح، وەزیری ڕۆشنبیری
۱۸. محەمەد سامح، وەزیری وەرزش و لاوان
۱۹. مازن ساڵحانی، وەزیری گەشتوگوزار
۲۰. محەمەد ئەبو خەیر شوکری، وەزیری ئەوقاف
۲۱. یەعرەب بەدر، وەزیری گواستەوە
۲۲. محەمەد سکاف، وەزیری پەرەپێدانی کارگێڕی
۲۳. حەمزە مستەفا، وەزیری ڕاگەیاندن