بەپێی هەواڵی کوردپرێس، ناوەندی ڕاگەیاندنی هەسەدە لە ڕاگەیەندراوێکدا بڵاویکردەوە، لە چوارچێوەی ئەو ئۆپەراسیۆنانەی کە هێزەکانیان دژی پاشماوەی شانە تیرۆریستییەکانی داعش ئەنجامی دەدەن، تیمەکانی ئۆپەراسیۆنە سەربازییەکانی هەسەدە (تۆل)، بە پاڵپشتی هێزەکانی هاوپەیمانی نێودەوڵەتی، ئۆپەراسیۆنێکی ئەمنییان ئەنجامدا.

ئاماژەی بەوەشکرد، ئۆپەراسیۆنەکە لە گوندی توەیمین سەر بە شەدادی لە باشووری ڕۆژهەڵاتی حەسەکە ئەنجامدراوە و ئەندامی یەکێک لە شانەکانی ڕێکخراوی داعش کرایە ئامانج و دەستگیرکرا.

بەگوێرەی ڕاگەیەندراوەکە، هەسەدە زانیاری لەسەر جموجۆڵ و چالاکییەکانی ئەو تیرۆرستە کۆ کردوەتەوە کە ناسراو بە "زاهیر کەیدی فیان" و  نازناوی "ئەبو غازی"ی لێنراوە و ئەندامێکی چالاکی داعش بووە و سەرقاڵی "بەقاچاخبردنی ئەندامە تیرۆریستییەکان بووە، بەتایبەت ژنانی داعشی بیانی لە کەمپی هۆل".

ئەوەشی خستەڕوو، لەمیانەی ئۆپەڕاسیۆنەکەدا دەستیان بەسەر ژمارەیێک چەک و تەقەمەنی و کەرەستەی سەربازیدا گرت کە بریتیبوون لە، دوو چەک لە جۆری کڵاشیفکۆف، ۱۰ مەغزەن و فیشەک لەگەڵ جلی سەربازی.

لە ڕاگەیەندراوەکەی هەسەدەدا ئەوەش هاتووە، "هێزەکانمان دووپاتی دەکەنەوە کە بەردەوام دەبن لە ئۆپەراسیۆنە ئەمنی و سەربازییەکانیان دژی ئەو ڕێکخراوە تیرۆریستییە تا ئەوکاتەی کۆتاییان پێدەهێنن و لە ڕەگەوە بنەبڕ ڕیشەکێش دەرکێت، هاوکات ئاسایش و سەقامگیری ناوچەکە دەپارێزین".