کوردپرێس

دکتۆر جەمال کۆچەر ئەندامی ئەنجومەنی سەرکردایەتیی یەکگرتووی ئیسلامیی کوردستان و نوێنەری ئەو حزبە لە پەرلەمانی عێراق لەبارەی هێرشی مووشەکی و درۆنیی شەوی ڕابردووی ئێران بۆسەر ئیسرائیل لە کوردپرێسی وت: هێرشەکەی ئەمجارەی ئێران جیاوازییەکەی سەرەکیی لەگەڵ هێرشەکانی پێشوودا هەبوو، ئەوەش ئەوە بوو کە یەکەمجارە ئێران لە خاکی خۆیەوە هێرشی ڕاستەوخۆی کردۆتە سەر ئیسرائیل.

ناوبراو لەمبارەوە زیاتر بە کوردپرێسی ڕاگەیاند: پێش ئەم ڕووداوە هەموو دونیا بۆیان دیار بوو کە ئێران بەنیار نییە خەڵکی ئیسرائیل بکوژێت و هیچ کەسێکیش نەبووە قوربانی و ئەو هێرشە زیانی گیانیی نەبوو، بەڵکوو هێرشەکەی ئێران ئاو چاو سەندن لە ئیسرائیل بوو.

دکتۆر جەمال کۆچەر وتیشی: بەداخەوە ئێمە وەکوو هەرێمی کوردستان هەموو جارێک دەبینە قوربانیی ململانێ ناوچەیی و جیهانییەکان و کاتی ئەوە گەیشتووە کە هەموو وڵاتانی ناوچەکە و جیهان ڕێز لە سەروەریی خاکی هەرێمی کوردستان و سنوورەکانی عێراق بگرن.