بەپێی هەواڵی کوردپرێس، لە پەیمانی کۆمەڵایەتی نوێیدا، کە جێگرەوەی دەستووری کوردستانی سووریایە، مەرجی ئەوە خراوەتەڕوو کە ناوی بەڕێوبەریی خۆسەریی بگۆڕدرێت بە "بەڕێوبەریی خۆسەریی دیموکراسی لە هەرێمی باکوور و رۆژهەڵاتی سووریا"، بەو پێیەی ئێستا لە هەرێمێک پێکهاتووە کە هەرێمی باکوور و رۆژهەڵاتی سووریایە و حەوت پارێزگا لەخۆ دەگرێت.

سەرلەبەیانی دوێنی، دانیشتنی پەسەندکردنی پەیمانی کۆمەڵایەتی نوێ لە رۆژئاڤا لە بارەگای بەڕێوبەریی خۆسەریی لە ڕەققە دەستیپێکرد و بە چەند هەموارکردنەوەیەک و زیادکردنێکی یاسای پێشوو کۆتایی هات.

هەروەها پەیمانە کۆمەڵایەتییە نوێیەکە ئەو گۆڕانکاریانە لەخۆدەگرێت کە کاریگەرییان لەسەر پێکهاتەی شارەوانییەکان هەبووە لە هەموو ناوچەکانی کوردستانی سووریا، بەو پێیەی "دەسەڵاتی شارەوانی دەگۆڕدرێت بۆ ئەنجومەن و دەستەی شارەوانییەکان".

هەروەها ناوی "ئەنجومەنی گشتی" گۆڕدراوە بۆ "ئەنجومەنی گەلی رۆژئاوای کوردستان" و هەندێک دامەزراوە بەپێی پەیمانەکۆمەڵایەتییە نوێیەکە دروست دەکرێن، وەک "دامەزراوەی چاودێری" و سەر بەخۆ دەبن لەگەڵ ئەنجومەنی گەلان، لەبری ئەنجومەنی جێبەجێ کردن و "ئەنجومەنی زانکۆکان".

جگە لەوەش لە پەیمانە کۆمەڵایەتییە نوێیەکەدا بڕیاری دامەزرانی فەرمانگەی ناوەندی دراو و نەختینە دراوە و دادگای پاراستنی پەیمانی کۆمەڵایەتیش دادەمەزرێت، کە وەک دادگایەکی دەستووری کاردەکات.

ئەنجومەنی گشتی ئاماژەی بەوەدا کە پەیمانە کۆمەڵایەتییە نوێیەکە بۆ بەڕێوبەریی خۆسەریی دیموکراتی لە بەرواری پەسەندکردنیەوە کاری پێدەکرێت.