بەپێی هەواڵی کوردپرێس، نێچیرڤان بارزانی سەرۆکی هەرێمی کوردستان لەبارەی باردۆخی فەلەستین ڕایگەیاند: ئێمە وەکوو گەلێک و وەکوو عێراقیش کەس بەقەد خەڵکی ئێمە نازانێ بەدبەختی و ناخۆشی شەڕ واتای چییە. ئەوە هەموومان دەزانین. بەردەوام گوتومانە و ئێستاش دەیڵێن، ئەم شەڕەش جەختکردنەوەیە لەوەی کە ئەو کێشەیە بە شەڕ چارەسەر ناکرێت و دەبێت بە ئاشتی و گفتوگۆ چارەسەر بکرێت.

نێچیرڤان بارزانی جەختی لەوەش کردەوە کە: مافی گەلی فەلەستینە کە دەوڵەتی خۆیان هەبێت؛ ئەوە مافێکی تەواوە. ئەگەر سەیری ناوچەکە بکەین ئەوە دەبینین فەلەستینییەکان مافێکی ئاسایی خۆیانە دەوڵەتی خۆیان هەبێت و بە ئاشتی بژین.

ناوبراو درێژیە دا ئەوەی ئێستا کراوە کە گەمارۆ لەسەر غەزە دانراوە ئێمە هەموومان پێمان ناخۆشە، چوونکە دەزانین بڕینی ئاو و کارەبا و خواردن مانای چییە؛ لە شوێنێک کە درێژییەکەی ۴۰ کیلۆمەترە و پانییەکەی ۱۰ کیلۆمەترە و ۲ ملیۆن و ۳۰۰ هەزار کەسی تێدا دەژین، ئەوە ناوچەکە بەرەو کارەساتێکی گەورەی مرۆیی دەبات. ئێمە هیوادارین بەزووترین کات ئەم شەڕە نەمێنێت و بەرۆکی عێراق و هیچ شوێنێکیش نەگرێت.

لە درێژەی وتەکانیدا سەرۆکی هەرێمی کوردستان لەبارەی جێبەجێ کردنی رێککەوتنی ئەمنیی نێوان عێراق و ئێران دەڵێت: "بەغدا لەگەڵ تاران رێککەوتنێکی ئەمنییان واژۆ کردووە. ئێمە لە هەرێمی کوردستان وەکوو بەشێک لە عێراق پابەندی جێبەجێ‌کردنی ئەو رێککەوتنەین".

بارزانی وتیشی: ئێمە پابەندین و ئەوەی تاوەکوو ئێستاش کردوومانە، بەپێی ئەو رێککەوتنە بووە. ئێمە پێداگری لەسەر ئەو پرەنسیپە دەکەین، هەرێمی کوردستان سەرچاوەی هەڕەشە نییە بۆ کۆماری ئیسلامیی ئێران. کۆماری ئیسلامیی ئێران دراوسێیەکی گرنگی ئێمەیە و سنوورێکی دوور و درێژمان لەگەڵی هەیە و دەمانەوێ ئەو کێشانە بە گفتوگۆ چارەسەر بکرێن. هەنگاوی باشمان بەرەو پێش ناوە. ئەوەی من ئاگاداربم، تا ڕادەیەکی زۆریش کۆماری ئیسلامی ئێران سوپاسگوزارە بەم هەنگاوانە".